Хитойдан олиб келинган CRRC-Dalian тезюрар электропоездларидан иккинчиси эндиликда Тошкент ва Андижон ўртасида йўловчиларга хизмат кўрсатади. 5 та вагондан иборат поезд замонавий қулайликлар билан жиҳозланган. Вагонларда йўловчилар учун қулай ўриндиқлар, иқлим назорати ҳамда телефон ва бошқа қурилмаларни қувватлаш имкониятлари мавжуд.
Янги поезднинг максимал тезлиги соатига 160 километрни ташкил этади. 730-сонли поезд ҳар куни соат 09:20 да Тошкент марказий вокзалидан йўлга чиқиб, Ангрен, Поп, Қўқон ва Марғилон бекатларида тўхтайди. У 13:35 да Андижонга етиб боради. Шу тариқа сафар давомийлиги 4 соат 15 дақиқани ташкил этади.
Андижон–Тошкент йўналишидаги 729-сонли поезд эса ҳар куни 15:38 да Андижондан жўнайди ва 19:53 да Тошкентга етиб келади.
Қатновнинг муҳим жиҳатларидан бири — поезднинг Қамчиқ довони орқали ҳаракатланишидир. Йўналишда узун тоғ туннели ҳам мавжуд. 19,2 километр узунликдаги Қамчиқ темирйўл туннели орқали поезд тоғ тизмасини кесиб ўтади. Мазкур иншоот МДҲ ҳудудидаги энг узун темирйўл туннели сифатида қайд этилган.
Туннель замонавий хавфсизлик ва муҳандислик тизимлари билан жиҳозланган. Унда шамоллатиш, ёнғин хавфсизлиги ҳамда фавқулодда вазиятларда фойдаланиладиган инфратузилма мавжуд.
Янги электропоезднинг йўлга қўйилиши Тошкент ва Фарғона водийси ўртасидаги темирйўл қатновида тезлик, қулайлик ва хавфсизликни янада оширишга хизмат қилади.
Таъкидлаш жоиз, мазкур қатнов амалдаги поезд таркиби ўрнига ташкил этилган.
Зулхумор Акбарова
