Қайд этилишича, жорий йил 12 ноябрга ўтар кечаси Тошкент шаҳрида ҳаво сифати кечки соатларда “яхши” даражада бўлди. Бироқ, ярим тундан кейин PM заррачалари миқдори аста-секин ошиб, Халқаро ҳаво сифати индекси (AQI) бўйича “ўртача” даражага ўтди. Миллий ҳаво сифати индекси бўйича эса тун давомида “яшил” даража сақланди.
Кечки соатларда ғарбдан кириб келган ҳаво массаси ва шамол PM заррачаларининг тарқалишига ёрдам берган. Туннинг иккинчи ярмида эса шамол тезлигининг пасайиши, ҳаво ҳароратининг тушиши, нисбий намликнинг ортиши ҳамда ҳарорат инверсиясининг шаклланиши ҳаво алмашинувини чеклаган. Натижада PM заррачаларининг ер юзасига яқин қатламда сақланиб қолиши учун шароит юзага келган. Шу билан бирга, юқори намлик айрим мониторинг қурилмаларида заррачалар миқдорининг юқорироқ қайд этилишига ҳам таъсир кўрсатган.
“Экологик мониторинг миллий маркази” мутахассислари томонидан Тошкент шаҳри ва Қибрай тумани ҳудудларида ҳаво сифати ҳолати бўйича инструментал ўлчовлар ўтказилган. Прогнозларга кўра, бугун, 12 ноябрь куни Тошкент шаҳрида ҳаво сифати кундузги соатларда Халқаро AQI бўйича “ўртача”, миллий индекс бўйича эса “яшил” даражада бўлиши кутилмоқда.
Кечки соатларда эса ҳаво сифати “сезгир гуруҳлар учун носоғлом” даражагача ўзгариши мумкин.
Муҳайё Тошқораева,
ЎзА
