Божхона қўмитаси Матбуот хизмати ушбу хабарларга муносабат билдириб, айни вақтда аэропорт орқали олиб кирилаётган мобил қурилмаларнинг божхона расмийлаштируви вақтинча тўхтатилганини маълум қилди.
Қўмитага кўра, сўнгги вақтларда мобил қурилмаларни божхона чегараси орқали олиб ўтишда IMEI кодларини сохталаштириш, бошқа қурилмаларга тегишли идентификаторлардан фойдаланиш ва бир телефон маълумотларини бошқа қурилмаларни қонунийлаштириш учун ишлатиш каби қонунбузилиш ҳолатлари кўпайган.
Маълум қилинишича, жорий йил бошидан буён «Тошкент-АЭРО» ихтисослаштирилган божхона комплекси томонидан жами 185 та ҳолатда қиймати 8,8 миллиард сўмлик 1 185 дона мобил алоқа воситаларининг ноқонуний олиб кирилишига чек қўйилган.
Божхона қўмитаси мобил қурилмаларнинг IMEI идентификаторларини, хусусан, IMEI-1 ва IMEI-2 кодлари битта қурилмага тегишли эканини ҳамда улар бўйича аввал тармоқ ҳодисаси содир бўлган-бўлмаганини аниқлаш махсус билим ва ихтисосликни талаб қилишини таъкидлаган.
Шу муносабат билан хориждан олиб кирилаётган телефонларнинг IMEI идентификаторларини аниқлаш ва уларнинг қонуний олиб кирилганини тасдиқлаш билан боғлиқ масалаларга ойдинлик киритилгунга қадар божхона расмийлаштируви вақтинча тўхтатилган.
Қайд этилишича, ушбу масалаларни ҳуқуқий жиҳатдан тўғри ва ягона тартибда ҳал этиш мақсадида тегишли идоралар билан ҳамкорликда чора-тадбирлар белгиланган. Вазиятга қисқа муддатларда ойдинлик киритилиши ва божхона расмийлаштируви белгиланган тартибда давом эттирилиши кутилмоқда.
Божхона қўмитаси фуқароларни тасдиқланмаган хабарларга ишонмасликка, фақат расмий манбаларда эълон қилинаётган маълумотларга таянишга чақирди.
Шунингдек, мобил қурилмаларни расмийлаштириш жараёнида коррупциявий ҳолатларга дуч келган ёки ушбу масалада саволлари бўлган фуқаролар Божхона қўмитасининг 24 соат ишлайдиган 11-08 қисқа рақамли ишонч телефонига мурожаат қилиши мумкин.
