Ички ишлар органлари маълумотига кўра, «Ёшлар орасида гиёҳвандликка қарши курашиш ойлиги» доирасида ўтказилган тезкор тадбирда йўл-патруль хизмати инспекторлари «Спарк» русумли автомобилни тўхтатиб текширган. Йўловчининг шубҳали хатти-ҳаракатлари сабабли уни шахсий кўрикдан ўтказиш жараёнида яширин усулда тарқатиш учун тайёрлаб қўйилган, қадоқланган синтетик наркотик моддалар аниқланган.
Шундан сўнг, Юнусобод тумани Ички ишлар органлари фаолиятини мувофиқлаштириш бошқармаси Жиноят қидирув бўлими ҳамда Давлат хавфсизлик хизмати ходимлари томонидан гумонланувчининг хонадони холислар иштирокида кўздан кечирилган. У ердан ҳам турли хил синтетик гиёҳвандлик воситалари, уларни қадоқлаш учун мўлжалланган пакетлар, респиратор ва тарозилар ашёвий далил сифатида олинган.
Аниқланишича, гумонланувчи интернет орқали иш қидириб, гиёҳвандлик воситаларини тарқатишга рози бўлган. У ўзининг кўрсатувида наркотик моддаларни тарқатиш қонун билан тақиқлангани ва бунинг учун жиноий жавобгарлик мавжудлигини ижтимоий тармоқлардаги ҳуқуқий тарғиботлар орқали билганини айтган.
Тезкор тадбир давомида жами 1 килограмм 500 грамм мефедрон, 120 грамм альфа-PVP ва 100 грамм «спайс» гиёҳвандлик воситалари тарқатилишининг олди олинган.
Мазкур ҳолат юзасидан Ўзбекистон Республикаси Жиноят кодексининг 273-моддаси билан жиноят иши қўзғатилиб, гумонланувчига нисбатан қамоққа олиш тарзидаги эҳтиёт чораси қўлланилган.
