Ички ишлар вазирлиги Тезкор-қидирув департаментига мурожаат қилган фуқаро номаълум шахслар уни автомобилда олиб қочишга уринганини, бироқ қаршилик кўрсатиб, қочиб қолишга муваффақ бўлганини билдирган.
Мазкур мурожаат асосида ўтказилган тезкор тадбир давомида икки нафар гумонланувчи қўлга олинган. Маълум бўлишича, улар 2000 ва 1998 йилларда Тошкент шаҳрида туғилган бўлиб, муқаддам Жиноят кодексининг 169-моддаси билан судланган.
Гумонланувчиларга тегишли транспорт воситаси кўздан кечирилганда, унинг юкхонасидан бир дона ўткир тиғли болта аниқланиб, процессуал тартибда расмийлаштириб олинган.
Тергов давомида уларнинг телефон қурилмаси текширилганда, Телеграм мессенжерида буюртмачи билан ёзишмалари аниқланган. Унда аризачини ҳар қандай йўл билан бўлса ҳам буюртмачига олиб бориш ҳақида кўрсатма берилгани маълум бўлган.
Шунингдек, ёзишмаларда яна бир фуқарони ҳам мажбуран олиб келиш топширилгани, зарур бўлса, унга электрошокер ишлатиб, ҳушсизлантириш орқали олиб келиш ҳақида кўрсатма берилгани қайд этилган.
Гумонланувчилар иккинчи фуқарони олиб кетиш мақсадида унинг ишхонаси олдида қарийб тўрт соат кутишган. Бироқ у хизмат сафарига кетганини билгач, режаларини бошқа кунга қолдиришган.
Мазкур ҳолат юзасидан гумонланувчиларга нисбатан Жиноят кодексининг 137-моддаси иккинчи қисми «б» ва «в» бандлари билан жиноят иши қўзғатилган.
Ички ишлар вазирлиги фуқаролардан ўзларига ёки яқинларига нисбатан товламачилик, зўравонлик ва таҳдид орқали пул ундириш, шунингдек, хизматларни ҳақ тўламасдан бажартириш каби ҳолатларга дуч келганда ички ишлар органларига мурожаат қилишни сўрамоқда. Мурожаатлар белгиланган тартибда кўриб чиқилиши, фуқароларнинг шахси сир сақланиши ва ҳуқуқлари қонун билан ҳимоя қилиниши кафолатланади.
