Шу йилнинг 10 май куни Тошкент шаҳрида кузатилган кучли ёғингарчилик оқибатида шаҳарнинг 8 та туманидаги 23 та манзилда сув тўпланиши ҳолатлари қайд этилди.
Тошкент шаҳри ҳокимлигининг маълум қилинишича, мурожаатлар Мирзо Улуғбек туманида 6 та, Яшнобод туманида 3 та, Шайхонтоҳур туманида 4 та, Миробод туманида 3 та, Яккасарой туманида 1 та, Олмазор туманида 2 та, Чилонзор туманида 2 та ҳамда Юнусобод туманида 2 та манзил бўйича келиб тушган.
Тегишли хизматлар маълумотига кўра, 10 май куни ёғингарчилик миқдори 35 миллиметрни ташкил этган. Унинг асосий қисми икки соатдан кам вақт ичида ёғиб ўтган бўлиб, бу ўртача ойлик меъёрнинг ярмидан кўпроғига тенг.
Қайд этилишича, Тошкент шаҳридаги мавжуд ёмғир сувларини чиқариш тизими бир кеча-кундузда 20 миллиметргача ёғингарчиликни қабул қилишга мўлжалланган. Бош режага мувофиқ, ушбу қувватни босқичма-босқич 36 миллиметргача ошириш режалаштирилган.
Мутахассислар фикрича, кучли ва қисқа муддатли ёмғир пайтида шаҳарнинг сув чиқариш инфратузилмаси юқори юкламага дуч келган. Айрим ҳудудларда келган сув ҳажми мавжуд ирригация тармоқлари ва қувурлар ўтказувчанлигидан ошиб кетгани сабабли сув тўпланиш ҳолатлари юзага келган.
Шунингдек, айрим жойларда чиқиндилар сабаб сув чиқариш тизимининг тиқилиб қолиши, ўзбошимчалик билан қурилган иншоотлар ҳамда ариқ ва ирригация тармоқларининг тўсиб қўйилиши вазиятни янада мураккаблаштиргани айтилди.
Оқибатларни бартараф этиш учун Фавқулодда вазиятлар вазирлиги, дренаж-коллектор тизимлари, коммунал хизматлар ва бошқа тегишли ташкилотлар мутахассислари жалб қилинган. Ҳудудларда 60 дан ортиқ махсус техника ишлаган.
Кўрилган чоралар натижасида сув тўпланиши билан боғлиқ ҳолатлар бир соат ичида тўлиқ бартараф этилган.
Ҳар бир манзил бўйича ишчи гуруҳлар томонидан вазият бирламчи тарзда ўрганилиб, зарур чоралар белгиланди. Хусусан, қуйидагилар кўриб чиқилмоқда:
— 5 та манзилда ирригация тизимини қуриш;
— битта ҳудудни лойиҳачилар билан биргаликда қайта ўрганиб чиқиш;
— қўшимча 3 та дюкер ўрнатиш;
— битта объектда диаметри 800 мм бўлган, бошқа бир қатор ҳудудларда эса диаметри 500 мм бўлган қувурларни ўрнатиш;
— қўшимча насос агрегатларини ўрнатиш ва сув чиқариш қувватини ошириш;
— 6 та қўшимча сув қабул қилиш панжарасини монтаж қилиш;
— тизимнинг айрим қисмлари ўтказувчанлик қувватини кучайтириш.
Ишлар манзилли давом эттирилади. Асосий эътибор ёмғир сувларини чиқариш тизимини босқичма-босқич модернизация қилиш, муаммоли ҳудудларнинг ўтказувчанлик қувватини ошириш ва келгусида локал сув тошиши хавфини камайтиришга қаратилади.
