Маълум қилинишича, фуқаро Ички ишлар вазирлиги Тезкор қидирув департаментига мурожаат қилиб, тўрт нафар шахсдан иборат гуруҳ томонидан босим ва таҳдидларга учраётганини билдирган.
Гумонланувчилар жабрланувчини гўёки гиёҳванд моддалар тарқатиш билан шуғулланган шахс сифатида тасвирга олиб, мазкур видеони ижтимоий тармоқларда тарқатиш ҳамда уни обрўсизлантириш билан қўрқитиб келган. Шунингдек, улар фуқародан 500 АҚШ доллари талаб қилган.
Тезкор-қидирув тадбири давомида гумонланувчилар Юнусобод туманидаги автотураргоҳлардан бирида пул маблағларини олаётган вақтда қўлга олинди. Улардан 300 АҚШ доллари, 2 миллион 400 минг сўм пул маблағи, 8 та мобил телефон, пичоқ ва бошқа ўткир буюмлар ашёвий далил сифатида олинган.
Аниқланишича, ушланганлар орасида 2006 йилда туғилган икки нафар шахс ҳамда 2008 ва 2009 йилларда туғилган икки нафар мактаб ўқувчиси бўлган.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда. Ҳуқуқни муҳофаза қилувчи органлар томонидан воқеанинг барча ҳолатларига ҳуқуқий баҳо берилиши таъминланади.
