Халқ депутатлари шаҳар Кенгашида транспорт ва йўл инфратузилмаси бўйича ҳисобот эшитилиб, мавжуд муаммолар ҳамда уларни бартараф этиш чоралари белгилаб олинди.
Маълум қилинишича, айни пайтда шаҳарда 169 та йўналишда 1927 та автобус ҳаракатланиб, кунига ўртача 23 минг қатнов амалга оширилмоқда. Кунлик йўловчилар сони 1,4 миллион нафарни ташкил этмоқда.
Шу билан бирга, тизимда қатор муаммолар сақланиб қолмоқда. Хусусан, тирбандлик вақтида автобус кутиш 35–40 дақиқагача чўзилмоқда, айрим йўналишларда интерваллар ортиб кетган. Автобуслар учун ажратилган йўлаклар шаҳар йўлларининг атиги 18,5 фоизини ташкил этади. Шунингдек, 700 дан ортиқ бекатда конструкциялар мавжуд эмас, яна 800 дан зиёд бекат зарур шароитлар билан таъминланмаган.
Муаммоларни бартараф этиш мақсадида қатор амалий чоралар белгиланди. Жумладан, қўшимча 240 та автобус харид қилиниб, 16 та янги йўналиш ташкил этилади. Кунлик қатновлар сони яна 2000 тага оширилади. Шунингдек, 56 км автобус йўлаклари ва 16,2 км BRT йўлаклари барпо этилиши режалаштирилган.
Бундан ташқари, ажратилган йўлакларда назоратни кучайтириш учун 600 дан ортиқ камера ўрнатилади. 1116 та бекат реконструкция қилиниб, 70 та янги бекат қурилади. Транспорт ҳаракатини самарали бошқариш мақсадида 545 та “ақлли” светофор ўрнатилиши ҳам кўзда тутилган.
Мутасаддилар таъкидлашича, мазкур чора-тадбирлар жамоат транспорти жозибадорлигини ошириш, аҳолига қулайлик яратиш ҳамда шаҳарда тирбандлик даражасини камайтиришга хизмат қилади.
