Йиғилишда мамлакатнинг интеллектуал салоҳиятини янада юксалтириш, илм-фан, таълим, маданият ва маънавиятни ривожлантириш, зиёлиларнинг жамият олдидаги масъулияти ва ўрнини мустаҳкамлаш масалалари муҳокама қилинди.
Урганч давлат педагогика институти ректори вазифасини бажарувчи, профессор Диёржон Абдуллаевнинг таъкидлашича, бугунги глобаллашув ва рақамлашув жараёнида зиёлиларнинг вазифаси фақат билим яратиш ёки уни бошқаларга етказиш билан чекланмайди. Улар жамият тафаккурини шакллантириш, ёш авлод қалбида Ватанга муҳаббат, миллий ўзлик ва умуминсоний қадриятларга ҳурмат туйғуларини юксалтиришда ҳам етакчи бўлиши лозим.
Шу нуқтаи назардан, педагогика олий таълим муассасалари зиммасига ҳам муҳим вазифалар юкланади. Жумладан, замонавий билим ва касбий компетенцияларга эга, мустақил фикрлайдиган, юксак маънавиятли, жамият тараққиётига дахлдорлик ҳисси билан яшайдиган янги авлодни тарбиялаш устувор йўналишлардан бири ҳисобланади.
Профессорнинг фикрича, зиёлилар жамиятда маърифат ва илм-фан тараққиётининг етакчи кучи бўлиши, ўз билим ва тажрибаси билан ёшларнинг дунёқараши шаклланишига ҳисса қўшиши зарур.
Бугунги мулоқот давомида илгари сурилаётган фикрлар, ташаббуслар ва таклифлар мамлакатнинг илмий-маърифий салоҳиятини янада ривожлантириш, зиёлилар ҳамжиҳатлигини мустаҳкамлаш ҳамда Янги Ўзбекистон тараққиётига муносиб ҳисса қўшишга хизмат қилиши таъкидланмоқда.
«Миллатнинг юксалиши, аввало, унинг тафаккури, илми ва маърифати юксалишидан бошланади», — дейди Диёржон Абдуллаев.
Ҳамкорлик материали
