Боиси бугун мамлакатлар истиқболи, биринчи навбатда, яратувчанлик қобилиятига эга етук авлод, замонавий технологияларни эгаллаган мутахассислар, янгиликдан чўчимайдиган, ташаббус билан яшайдиган ёшлар салоҳияти орқали баҳоланаётир. Юртимизда ҳам шу тамойил изчил давом эттирилмоқда. Ёш авлоднинг билим олиши, касб эгаллаши, тадбиркорлик қилиши, илм-фан билан шуғулланиши, замонавий технологияларни ўзлаштириши, халқаро майдонда муносиб рақобат қилиши учун яратилаётган шароитлар ягона тизим асосида ривожланяпти.

30 июнь — Ёшлар куни муносабати билан давлатимиз раҳбарининг йигит-қизлар билан учрашуви ушбу сиёсатнинг навбатдаги босқичини белгилаб берди. Мулоқот давомида эришилган натижалар чуқур таҳлил қилинди, замонавий касблар, сунъий интеллект, инновацион иқтисодиёт, ёшлар тадбиркорлиги, халқаро таълим, давлат бошқарувида истеъдодли кадрларни қўллаб-қувватлаш, ижтимоий ҳимоя ҳамда маънавий тарбия билан боғлиқ қатор ташаббуслар илгари сурилди. Бу ташаббуслар бугунги кун эҳтиёжларига жавоб бериш билан чекланмай, узоқ истиқболни кўзлаган тараққиёт моделининг узвий қисми ҳамдир.

Мустаҳкам пойдевор

Ҳар қандай ислоҳотнинг умрбоқийлиги, аввало, кундалик ҳаётга қанчалик чуқур кириб боргани билан белгиланади. Кейинги даврда ёшлар сиёсати ҳам айнан шу мезон асосида янги мазмун касб этмоқда. Хусусан, ёшлар билан ишлаш алоҳида кампаниялар ёки маълум саналарга боғланган тадбирлар доирасидан чиқиб, давлат бошқарувининг узлуксиз фаолият юритадиган тизимига айланди. Маҳаллаларда ёшлар етакчилари фао­лиятининг йўлга қўйилгани, ҳар ҳафтанинг пайшанба куни “Ёшлар куни” сифатида белгилангани вазирлик ва идоралар эътиборини бевосита ёшлар ҳаётига қаратди.

Яратилган тизим қисқа фурсатда аниқ натижаларни берди. “Ёшлар дафтари” орқали 1,5 миллион йигит-қизнинг турли масалалари ҳал этилди. Минглаб оилаларнинг турмуш шароити яхшилангани, таълим олиш, иш топиш, касб эгаллаш ҳамда тадбиркорлик фаолиятини бошлаш учун очилган янги имкониятлар ҳам айни тизим самарасидир. Муҳими, давлатнинг ёшлар билан мулоқоти мурожаат келишини кутадиган тартибдан уларнинг эҳтиёжини олдиндан аниқлайдиган фаол механизмга кўчди.

Олиб борилган ишлар иқтисодий фаол­ликда ҳам яққол кўринмоқда. Сўнгги йилларда ёш тадбиркорлар сони беш баробар ўсиб, 287 мингдан ошди. Шунингдек, ёшлар салоҳиятининг ўсиши таълим ва илмий ютуқларда ҳам намоён. Бугунги кунда

3,5 миллион йигит-қиз хорижий тилларни чуқур ўрганмоқда. Иқтидорли ўқувчи ва талабалар нуфузли халқаро фан олимпиадаларида 434 та медални қўлга киритди. Ёш спортчилар эса халқаро мусобақаларда 2245 та медаль билан юртимиз шарафини муносиб ҳимоя қилди. Учрашувда Президентимиз эришилган ана шу натижаларни янги босқич учун таянч сифатида баҳолади. Давлатлар ўртасидаги рақобатнинг мазмуни тубдан ўзгариб бораётган бир шароитда устунлик билим, технология ва инсон капитали билан белгиланаётгани таъкидланди. Шулардан келиб чиққан ҳолда қатор йўналишлар кесимида муҳим вазифа ва ташаб­буслар илгари сурилди. Қуйида уларнинг аҳамияти, зарурати ва миқёси ҳақида мухтасар фикр юритишни мақсад қилдик.

Тараққиёт сармояси

Меҳнат бозори доимий равишда янгиланаётган кўникмаларни, замонавий технологияларни ўзлаштирган, амалий тажрибага эга мутахассисларни талаб қилаётгани сир эмас. Шу сабаб мамлакатимизда таълим тизими ҳам янги мазмун билан бойитилиб, билим бериш жараёни ишлаб чиқариш, тадбиркорлик ва замонавий касблар билан узвий боғланмоқда. Илгари сурилган янги ташаббуслар айнан ана шу эҳтиёжлардан келиб чиқди, дейиш мумкин.

Жумладан, ёшларни келажак касбларига тайёрлаш мақсадида йўлга қўйилаётган “Келажак билимлари экотизими” ушбу йўналишдаги энг йирик лойиҳалардан биридир. Дастур доирасида ҳар йили 500 минг нафар йигит-қизни замонавий касбларга ўқитиш режалаштирилган. Ўқув марказларини ташкил этишга бел боғлаган ташаббускор ёшларга ер участкалари ҳамда давлат объект­лари имтиёзли шартлар асосида ажратилиши, зарур инфратузилманинг давлат ҳисобидан барпо этилиши, қурилиш ва жиҳозлаш харажатлари бўйича кредит ставкаларининг қопланиши таълим соҳасига хусусий секторни кенг жалб этиш йўлида муҳим қадам бўлиши шубҳасиз. Бу ёндашув, ўз навбатида, янги ўқув масканлари сонини кўпайтириш билан бир қаторда таълим сифати ва рақобат муҳитини ҳам мустаҳкамлашга хизмат қилмоқда.

Шунингдек, касб эгаллаш йўлидаги имкониятлар турли қатламдаги ёшлар ­эҳтиёжидан келиб чиқиб шакллантирилиши мақсадга мувофиқ. Шу мақсадда жорий этилаётган “касб ваучери” тизими орқали қўлида ҳунари бор йигит-қизлар янги йўналишларни ўрганиш имконига эга бўлади. Ҳар йили

50 минг нафар ёшнинг замонавий касбларни ўзлаштириш харажатлари фоизсиз ссудалар ҳисобидан молиялаштирилади. Эҳтиёжманд оилалардаги 85 минг ишсиз ёшга хусусий ўқув марказларида бепул таълим олиш учун ваучерлар берилиши режалаштирилган. Жорий йилнинг ўзида ушбу мақсадлар учун

120 миллиард сўм йўналтирилаётгани мазкур йўналиш устувор вазифа сифатида кўрилаётганидан дарак.

Касбий таълим тизимини замон талаб­лари билан уйғунлаштириш техникумлар фаолиятида ҳам янги имкониятларни юзага чиқармоқда. Хусусий сектор иштирокининг кенгайтирилиши, лицензиялаш тартибларининг соддалаштирилиши, янги ўқув йилидан бошлаб хусусий техникумларга ҳам касбга ўқитиш бўйича давлат грантлари ажратилиши таълим бозорида соғлом рақобатни кучайтиради. Халқаро касб танловларида ғолиб бўлган ёшлар ҳамда уларнинг устозларини муносиб рағбатлантириш механизмларининг жорий этилиши эса профессионал маҳоратнинг жамиятдаги нуфузини янада юксалтиришга хизмат қилади.

Айни вақтда таълим ва касб ўргатиш борасидаги ислоҳотлар бандлик масаласи билан узвий боғлиқ. Дунёнинг ривожланган давлатлари тажрибаси ҳам шу ҳақиқатни тасдиқлайди. Масалан, Германия, Жанубий Корея, Сингапур сингари мамлакатларда ёшларнинг иқтисодий фаоллигини ошириш таълим тизими, бизнес муҳити ва молиявий қўллаб-қувватлаш механизмларини ягона занжирга боғлаш орқали йўлга қўйилган. Бундай ёндашув ташаббускор ёшларнинг меҳнат бозорига тез кириб келишига, янги иш ўринлари яратишига кенг йўл очади.

Ўзбекистонда ҳам ана шундай узвий тизим босқичма-босқич қарор топмоқда. Мисол тариқасида ёшларнинг бизнес бошлаш йўлидаги илк қадамларини қўллаб-қувватлаш мақсадида “Ёшлар мини-франшизаси” дастури ишга туширилаётганини айтиш мумкин. Маҳаллий брендларнинг тайёр бизнес моделини танлаган йигит-қизларга Ёшлар тадбиркорлиги жамғармаси томонидан 300 миллион сўмгача фоизсиз ссуда ажратилиши кўзда тутилган. Ушбу дастурлар учун 500 миллиард сўм йўналтирилади. Тайёр тажриба асосида фаолият бошлаш имконияти бизнес юритишдаги дастлабки хатоларни камайтириш, бозор талабини тезроқ англаш ва барқарор фаолиятни йўлга қўйиш учун муҳим омил саналади.

Ёшларни иш билан таъминлашда ҳам янги механизмлар жорий этилмоқда. Олий таълим муассасасини тамомлаган битирувчини ишга қабул қилган тадбиркорлар учун ёш мутахассисга нисбатан даромад ҳамда ижтимоий солиқ бир йил давомида 1 фоиз этиб белгиланмоқда. Мазкур рағбат 200 минг­га яқин битирувчининг меҳнат бозорига кириб келишини енгиллаштириши кутиляпти.

Бундан ташқари, йигит-қизларнинг бизнес бошлаши йўлидаги ташкилий тўсиқларни қисқартириш ҳам эътибордан четда қолгани йўқ. Касб ўрганиш, ишга жойлашиш, тадбиркорлик фаолиятини йўлга қўйиш бў­йича хизматларни бир жойда тақдим этадиган тегишли хаблар айнан шу мақсадга хизмат қилади. Дастлаб Сурхондарё вилоятида синов тариқасида йўлга қўйиладиган мазкур тажриба кейинчалик бошқа ҳудудларда ҳам жорий этилади. Турли идоралар ўртасида сарсон бўлиш ўрнига барча зарур хизматларнинг ягона манзилда жамланиши ёшларнинг вақти ҳамда имкониятларини тежаши тайин.

Ёшлар тадбиркорлигини сифат жиҳатидан янги босқичга олиб чиқишда Банк-молия академиясига алоҳида вазифа юклатилмоқда. Академия ҳудудларнинг иқтисодий салоҳиятидан келиб чиқиб тайёр бизнес лойиҳаларини ишлаб чиқади, Ёшлар тадбиркорлиги жамғармаси эса юқори даромад келтирадиган, кўплаб иш ўринлари яратишга қодир ташаббусларга 5 миллиард сўмгача инвестиция киритади. Мазкур тизим камида 300 минг нафар ёшнинг ўз бизнесини йўлга қўйишига кўмаклашиши кўзда тутилган. Бу ёндашув ёшларни иш изловчи сифатида тарбиялаш йўлидан иш ўрни яратувчи кучга айлантириш ғоясига таянади. Зеро, иқтисодий тараққиётнинг бугунги талаби ҳам айнан шуни тақозо этмоқда.  

Дунёга юзланган авлод

Асримизда давлатларнинг халқаро майдондаги нуфузи кўп жиҳатдан уларнинг қандай маҳсулот ишлаб чиқараётгани билангина эмас, қандай ғоя таклиф қилаётгани, ўз маданияти ва илмий салоҳиятини дунёга қай даражада танита олаётгани билан ҳам баҳоланмоқда. Бу жараёнда энг фаол коммуникаторлар, табиийки, ёшлар ҳисобланади. Чет тилларни биладиган, турли маданий муҳитларда бемалол мулоқот қила оладиган, замонавий ахборот маконининг қонуниятларини тушунадиган авлод мамлакатнинг ўзига хос “юмшоқ куч” ресурсидир. Шу нуқтаи назардан, бугунги ёшлар сиёсати ички тараққиёт билан бир қаторда Ўзбекистоннинг халқаро майдондаги интеллектуал ва маданий иштирокини кенгайтиришда ҳам муҳим ўринга эга.

Бугунги кунда хорижий тилларни мукаммал эгаллаган 650 мингдан ортиқ йигит-қиз салоҳиятидан мамлакатимизнинг бой тарихи, бебаҳо маданий мероси, туризм салоҳия­ти ҳамда экспорт имкониятларини халқаро аудиторияга етказишда самарали фойдаланиш бўйича мутлақо янги ёндашув таклиф этилди. Айни мақсадда рақамли контент платформаси ишга туширилиб, ҳар йили 20 миллиард сўм ажратилиши белгиланди.

Сир эмаски, дунёда тобора кучайиб бораётган рақамли дипломатия шароитида сифатли мультимедиа маҳсулотлари, таҳлилий материаллар, видеоконтент ва креатив лойиҳалар мамлакат имижини шакллантиришнинг муҳим воситаларидан бирига айланган. Ёшларнинг ушбу жараёндаги фаол иштироки юртимиз ҳақидаги тасаввурларни замонавий коммуникация воситалари орқали бойитиши лозим.

Жаҳон амалиётида “brain circulation” — билим ва тажрибанинг эркин ­алмашинуви тамойили тобора кенг қўлланмоқда. Бундай модель юқори малакали кадрлар салоҳия­тини миллий ривожланиш манфаатлари йўлида сафарбар этишда муҳим восита сифатида эътироф этилади. Хал­қаро таълим маконида таҳсил олаётган ватандошлар билан алоқаларни мус­таҳкамлаш ташаббуси эса ушбу тенденциянинг бундан буён бизда ҳам амалиётга татбиқ этилишини англатади. Унга кўра, етакчи хорижий олийгоҳларда ўқиётган

14 мингдан ортиқ талаба таътил даврида вазирликлар, ҳокимликлар, давлат ташкилотлари ҳамда хусусий компанияларда амалиёт ва стажировка ўташи учун махсус рақамли платформа йўлга қўйилади. Ушбу тизим ёшларнинг хорижда орттирган билим ва тажрибасини мамлакат тараққиёти билан боғлаш имконини беради.

Яна бир эътиборга молик жиҳат “Эл-­юрт умиди” жамғармаси фаолиятининг янги йўналиш билан бойитилишидир. Эндиликда хусусий сектор буюртмалари асосида ҳам ёшларни дунёнинг нуфузли олий таълим муассасаларига юбориш мумкин. Мазкур механизм меҳнат бозорининг реал эҳтиёжлари билан халқаро таълимни ўзаро боғлайди. Натижада иқтисодиётнинг турли тармоқлари ўзига зарур мутахассисларни тайёрлаш жараёнида бевосита иштирок этиш имконига эга бўлади.

Рақамли тафаккур ва сунъий интеллект

Сунъий интеллект, катта ҳажмдаги маълумотларни қайта ишлаш, рақамли хизматлар ва юқори технологиялар иқтисодий ўсишнинг асосий драйверлари қаторидан жой олмоқда. Жаҳоннинг етакчи давлатлари миллиардлаб доллар инвестицияларни айнан шу йўналишларга йўналтираётгани бежиз эмас. Бу жараёнда ёшлар энг фаол иштирокчи, янги технологияларни тез ўзлаштирадиган ва амалиётга татбиқ этадиган асосий куч сифатида майдонга чиқмоқда. Шу боис, рақамли иқтисодиёт учун кадрлар тайёрлаш масаласи стратегик устуворлик даражасига кўтарилди.

Илгари сурилаётган ташаббуслар ушбу йўналишнинг мутлақо янги босқичга кираётганидан далолат беради. Хусусан, “Рақамли ҳукумат” марказида мамлакатимиздаги илк суперкомпьютер кластерининг ишга туширилиши илмий изланишлар ва мураккаб ҳисоб-китобларни бажариш имконият­ларини сезиларли даражада кенгайтирмоқда. Келгуси йилда унинг қувватини уч баробар ошириш режалаштириляпти. Шу билан бир қаторда, жорий йилнинг ўзида 20 та олий таълим муассасасида сунъий интеллект лабораториялари ташкил этилиши ёш тадқиқотчилар ва талабаларга илғор технологиялар билан бевосита ишлаш ­имконини беради. Муҳими, ушбу лабораториялар фақат ўқув майдони эмас, ҳудудлар ва тармоқлардаги долзарб муаммоларга иннова­цион ечимлар ишлаб чиқиладиган илмий-амалий платформа сифатида фаолият юритади.

Рақамли трансформация жараёнида инфратузилманинг кенгайиши ҳам муҳим ўрин тутади. Янги АТ паркларининг барпо этилиши ҳисобидан 20 мингдан ортиқ йигит-қиз учун юқори даромадли иш ­ўринлари ­яратилиши кўзда тутилган. Бу ташаббус ахборот технологияларини мамлакат иқтисодиётининг янги ўсиш нуқталаридан бирига айлантиришни мақсад қилган. Шу билан бирга, “Менинг биринчи компьютерим” дас­тури орқали эҳтиёжманд оилалардаги 10 минг нафар ёшга ноутбук харид қилиш учун кўмак берилиши рақамли тенгликни таъминлаш йўлидаги муҳим қадамлардан бири.

Қолаверса, кадрлар тайёрлаш тизимида мазмун жиҳатидан янги ёндашув шаклланмоқда. Ахборот технологиялари ва сунъий интеллект йўналишларида таҳсил олаётган талабалар учун дуал таълим моделининг кенгайтирилиши назария билан амалиёт ўртасидаги узвий боғлиқликни кучайтиради. “Муҳаммад ал-Хоразмий” номидаги давлат стипендияси ҳамда иқтидорли қизлар учун таъсис этилган “Муҳандис қизлар” стипендияси илмий салоҳиятни рағбатлантиришга хизмат қилади. Халқаро фан олимпиадалари ғолибларига берилаётган 1 миллиард сўмлик мукофотнинг эндиликда сунъий интеллект бўйича халқаро олимпиадалар совриндорларига ҳам татбиқ этилиши эса ушбу йўналиш давлат миқёсида алоҳида устувор аҳамият касб этаётганидан далолат.

Рақамли маконда миллий манфаатларни илгари суриш масаласи ҳам эътибордан четда қолмаяпти. АТ паркларда компьютер ва мобил ўйинлар ишлаб чиқувчилар учун инкубацион марказлар ташкил этилиши, ҳар йили миллий руҳни акс эттирадиган камида 20 та ўйин яратиш бўйича давлат буюртмаси берилиши креатив иқтисодиёт имкониятларидан самарали фойдаланишда қўл келади. Компьютер ўйинлари миллиардлаб инсонларни қамраб оладиган глобал маданий маҳсулотга айланган. Ана шундай майдонда миллий тарих, қадрият ва қаҳрамонлик тимсолларини замонавий форматларда намойиш этиш ёш авлоднинг дунёқарашини бойитиш билан бирга ватанимиз маданий салоҳиятини халқаро аудиторияга етказишнинг таъсирчан воситаларидан бири бўлиб хизмат қилиши мумкин.

Рақамли технологияларни пухта эгаллаш, сунъий интеллект имкониятларидан самарали фойдаланиш ёки замонавий муҳандислик кўникмаларини ривожлантириш ўз-ўзидан якуний мақсадни ифодаламайди. Ушбу салоҳият янги ғоя, янги маҳсулот ва бизнес ечимлари орқали иқтисодиётда амалий натижа берган паллада ҳақиқий қиймат касб этади. Замонавий дунёда иқтисодий ўсишнинг муҳим қисми айнан инновацион экотизимлар ҳисобига таъминланмоқда. Бир вақтлар кичик талабалар лойиҳаси сифатида иш бошлаган кўплаб технологик компаниялар бугун глобал бозорнинг қиёфасини белгилаб бераётгани яхши маълум. Бундай тажриба креатив фикрлашни қўллаб-қувватлаш, таваккал қилиш маданиятини ривожлантириш ҳамда ёшларнинг ташаббусига ишонч билдириш узоқ муддатли тараққиёт учун нақадар муҳим эканини кўрсатади.

Давлатимиз раҳбари белгилаб берган устувор вазифалар ҳам айнан шу стратегик қарашга таянади. 2030 йилгача мамлакатимиз иқтисодиёт ҳажмини 240 миллиард доллардан ошириш мақсади қўйилган. Бу улкан маррага эришиш ишлаб чиқариш ҳаж­мини кенгайтиришдангина иборат эмас, албатта. Юқори қўшилган қиймат яратадиган, ­илм-фан ва технологияга таянган иннова­цион маҳсулотлар улуши изчил ортиб бориши зарур. Шу боис, барча соҳаларга янги ғоя олиб кирадиган стартап ташаббусларини қўллаб-қувватлаш стратегик вазифа.

Мазкур йўналиш бўйича шаклланган пойдевор ҳам эътиборга молик. Сўнгги тўққиз йил давомида мамлакатимиз стартап экотизими 15 баробар ўсиб, 4 миллиард доллардан ортиқ қийматга эга бўлди. Шу давр ичида 1200 дан зиёд истиқболли стартап лойиҳалари юзага келди. Янги босқичда ушбу жараён янада тизимли тус олади. Ҳар бир вазир, тармоқ ҳамда ҳудуд раҳбарлари ўз фаолиятидаги долзарб масалаларни ёшларнинг инновацион ғоялари орқали ҳал этишга қаратилган “1 мингта масалага — ёшлардан 1 мингта ечим” лойиҳасини йўлга қўяди. Бу ёндашув бошқарув тизимида очиқ инновациялар тамойилини кенг жорий этиш имконини беради. Турли соҳаларда тўпланган амалий муаммолар истеъдодли ёшлар учун янги илмий изланишлар, стартаплар ва технологик ечимлар манбаига айланади. Ёшлар ишлари агентлиги томонидан бизнес, ахборот технологиялари ва креатив иқтисодиёт йўналишларидаги энг истиқболли 100 та

лойиҳага 1 миллиард сўмгача инвестиция киритилиши режалаштирилгани ушбу тизимнинг муҳим молиявий таянчини яратади.

Шунингдек, ёшлар билан ишлаш тизимида индивидуал ёндашув тобора муҳим ўрин эгалламоқда. Ҳаётий шароити, оилавий аҳволи ёки тақдир тақозоси билан мураккаб вазиятга тушиб қолган йигит-қизларнинг жамиятдан узилиб қолишига йўл қўймаслик устувор вазифалар қаторида. Шу мақсадда ота-она қарамоғидан маҳрум бўлган, ҳарбий хизматдан, миграция жараёнларидан сўнг юртга қайтиб келган, жазони ўтаб чиққан ҳамда жисмоний имконияти чекланган ёшларни қўллаб-қувватлаш учун “Кафолатланган биринчи қадам” пакети жорий этилмоқда.

Ижтимоий интеграция масаласи таълим муассасалари фаолиятида ҳам янгича мазмунга эга бўляпти. “Устоз — талаба” дастури доирасида уюшмаган ёшларга кўмаклашаётган талабаларни рағбатлантириш тизими жорий этилади. Шунингдек, ёшларнинг давлат ва жамият бошқарувидаги иштирокини кенгайтириш ҳам мазкур сиёсатнинг муҳим йўналишларидан бири саналади. Айни мақсадда бешта йўналиш бўйича “ТОП-100” дастури амалга оширилади. Ғолиблар муносиб тақдирланиб, раҳбарлик лавозимларига тавсия этилади. Ҳар бир вазирлик ва тармоқ ўз соҳасидаги истеъдодли ёшларни саралаб, халқаро ташкилотларга стажировка ўташ учун юборади. Йилига 2 минг нафар ёшнинг ана шундай дастурларда иштирок этиши режалаштирилган.

Ёшларни ягона мақсад атрофида бирлаштириш ва уларнинг фаоллигини рағбатлантириш мақсадида “Ўзбекистон ёшлар лигаси” платформаси ишга туширилади. Мазкур тизим орқали таълим, илм-фан, тадбиркорлик, касбий ривожланиш ва жамоатчилик фаолиятидаги натижалар баҳоланади. Юқори кўрсаткичларга эришган ёшларга грантлар, контракт тўловлари бў­йича имтиёз­лар, касб ваучерлари, хорижий стажировкалар, имтиёзли кредитлар, ипотека имкониятлари ҳамда кадрлар захирасидан ўрин олиш имконияти тақдим этилади.

Мазкур йўналишдаги ташаббуслар ­“Ватан меҳри — ижтимоий ташаббуслар” танлови, ижтимоий хавф гуруҳидаги болаларни қўллаб-қувватлашга қаратилган ­“Қанот” лойиҳаси ҳамда “Ёшлар ташаббус­лари марафони” давомида илгари сурилган ғояларни амалиётга татбиқ этишга хизмат қиладиган “Ташаббуслар офиси” фаолияти билан янада бойитилмоқда. Ушбу мақсадлар учун 50 миллиард сўм ажратилиши режалаштирилган.

Мухтасар айтганда, ўз олдига аниқ мақсад қўйган, меҳнат қилишдан чўчимайдиган, билимини мунтазам бойитиб борадиган ёшлар мамлакатнинг бугуни ва эртаси, таянч нуқтасидир. Янги Ўзбекистоннинг бунёдкорлари ҳам ана шу изланувчан, ташаббускор ва Ватан равнақи учун масъулиятни чуқур ҳис этадиган ёшлар. Уларнинг билим ва салоҳиятига таяниб амалга оширилаётган кенг кўламли ислоҳотлар юртимизни янги марралар сари етаклайди. Бундай ишонч ва эътибор эса ҳар бир ёшни фақат ўз келажаги учун эмас, халқ ва давлат истиқболи учун ҳам масъул эканини чуқур англашга ундайди.

Аслиддин АБДУРАЗЗОҚОВ,

“Янги Ўзбекистон” мухбири