Қўмита маълумотига кўра, қайта ҳисоблаш халқаро эксперт-демографлар билан ҳамкорликда ва уларнинг услубий тавсиялари асосида амалга оширилган.

Ҳисоб-китобларда демографик баланс усулидан фойдаланилган. Бунда ҳар бир олдинги йил бошидаги аҳоли сонини аниқлаш учун кейинги йил бошига қайта ҳисобланган аҳоли сонидан йил давомида туғилганлар ва кўчиб келганлар айирилган, вафот этганлар ҳамда кўчиб кетганлар эса қўшилган.

Яъни, аҳоли сони қуйидаги формула асосида ортга қараб ҳисобланган:

Олдинги йил бошидаги аҳоли сони = кейинги йил бошидаги аҳоли сони − туғилганлар + вафот этганлар − кўчиб келганлар + кўчиб кетганлар.

Масалан, қайта ҳисоб-китобларга кўра, 2026 йил 1 январь ҳолатига Ўзбекистоннинг доимий аҳолиси 39 миллион 23,6 минг кишини ташкил этган. 2025 йил давомидаги демографик ўзгаришлар ортга қайтарилганда, 2025 йил 1 январь ҳолатига аҳоли сони 38 миллион 321,6 минг киши бўлган.

Бунда 702 минг кишилик фарқни оддий арифметик ҳисоблаш орқали аниқлаш билан чекланилмаган. Ҳисоб-китоблар аҳолининг ҳар бир жинс ва ёш гуруҳи бўйича алоҳида амалга оширилган.

Хусусан, вафот этганлар ва кўчиб кетганлар қайта қўшилган, кўчиб келганлар айирилган, йил давомида туғилган болалар ҳисобдан чиқарилган. Қолган аҳоли эса бир ёшга ортга сурилган.

Ушбу жараён ҳар бир олдинги йил учун такрорланиб, 2010–2026 йилларни қамраб олган ягона демографик маълумотлар қатори шакллантирилган. Ҳисоблашда ҳудудлар, шаҳар ва қишлоқ аҳолиси, жинс ва ёш таркиби, шунингдек, маъмурий-ҳудудий ўзгаришлар ҳам инобатга олинган.

Йиллар кесимида Ўзбекистоннинг доимий аҳолиси қанча бўлган?

Миллий статистика қўмитаси эълон қилган қайта ҳисобланган маълумотларга кўра, аҳоли сони қуйидагича:

ЙилАҳоли сони (минг киши)
202639 023,6
202538 321,6
202437 559,1
202336 766,7
202235 981,5
202135 258,4
202034 585,0
201933 928,4
201833 327,4
201732 788,1
201632 228,0
201531 654,6
201431 110,7
201330 596,6
201230 139,5
201129 689,1
201029 215,9

Қайд этиш жоизки, аввалги ва қайта ҳисобланган аҳоли сони ўртасидаги фарқ барча йилларга бир хил тақсимланмаган. Ҳар бир йил учун кўрсаткич туғилиш, ўлим ва миграция жараёнлари асосида алоҳида қайта тикланган.

Шу тариқа, аҳолини рўйхатга олиш натижалари мамлакатнинг демографик кўрсаткичларини аниқлаштириш, аҳоли таркибидаги ўзгаришларни таҳлил қилиш ва келгуси ижтимоий-иқтисодий режалаштириш учун янгиланган статистик асос яратди.