Бу ҳақда Австриянинг Вена шаҳрида бўлиб ўтаётган Глобал сифат форуми доирасида БМТнинг Саноатни ривожлантириш ташкилоти (UNIDO) томонидан эълон қилинган 2026 йилги индекс натижаларида маълум қилинди.
Мазкур индекс мамлакатларда барқарор ривожланишни таъминлашга хизмат қилувчи сифат инфратузилмасининг ривожланганлик даражасини баҳолайди. У метрология, стандартлаштириш, аккредитация, мувофиқликни баҳолаш ҳамда бозор назорати каби бешта асосий йўналишни қамраб олади.
Индекснинг асосий мақсади халқаро савдони ривожлантириш, саноат маҳсулотларининг сифати ва хавфсизлигини таъминлаш, миллий ишлаб чиқарувчилар рақобатбардошлигини ошириш ҳамда Барқарор ривожланиш мақсадларига эришишга кўмаклашишдан иборат.
Ўзбекистоннинг ушбу рейтингдаги кўрсаткичлари сўнгги йилларда изчил яхшиланиб бормоқда. Хусусан, мамлакат 2022 йилда 130-ўринни, 2024 йилда 95-ўринни эгаллаган бўлса, 2026 йилда 67-ўринга кўтарилди. Шу тариқа, тўрт йил давомида рейтингдаги мавқе 63 поғонага яхшиланди.
2026 йилги индекснинг кучли ўнталигидан Хитой, Германия, Франция, Италия, Буюк Британия, Жанубий Корея, Ҳиндистон, Испания, Австралия ва АҚШ жой олди.
МДҲ давлатлари орасида Россия 18-ўринни, Қозоғистон 61-ўринни, Ўзбекистон 67-ўринни, Молдова 68-ўринни, Беларусь 78-ўринни, Озарбайжон 92-ўринни, Тожикистон 125-ўринни, Арманистон 126-ўринни ва Қирғизистон 143-ўринни эгаллади.
Шу тариқа, Ўзбекистон МДҲ мамлакатлари орасида Россия ва Қозоғистондан кейин учинчи натижани қайд этди.
Ушбу кўрсаткич мамлакатда сифат инфратузилмасини такомиллаштириш, халқаро стандартларни жорий этиш, метрология ва аккредитация тизимларини ривожлантириш, маҳсулотлар сифати ҳамда хавфсизлигини таъминлаш борасидаги ислоҳотларнинг халқаро рейтингдаги аксидир.
