Бу ҳақда Spot.uz Автомобиль йўллари қўмитаси матбуот хизмати маълумотига таяниб хабар берди.
17 август куни Президент матбуот хизмати Урганч — Хива (Т-001) автомобиль йўлида ҳақ эвазига қатнов йўлга қўйилишини маълум қилган эди. Янги йўл орқали ҳаракатланиш вақти 45–50 дақиқадан 15–20 дақиқагача қисқариши кутилмоқда.
Яқинда Хивадан Урганч халқаро аэропортига узунлиги 35 километр бўлган мазкур янги автомобиль йўли орқали борилди.
Тўрт полосали трасса лойиҳаси доирасида ерости туннели, 8 та йўл ўтказгич, 15 та кўприк ва 106 та сув ўтказувчи иншоот қурилган. Йўлнинг ўтказувчанлик қуввати кунига 30 мингдан ортиқ автомобилни ташкил этади.
Йўл ҳақи автомобилларни тўхтатмаган ҳолда электрон шаклда ундирилади. Транспорт оқими ва тўлов тизими сунъий интеллект асосидаги рақамли ечимлар орқали бошқарилади.
Енгил автомобиллар (M1) учун Хивадан Урганчгача ва орқага бўлган тўлиқ йўналишда йўл ҳақи 25 минг сўмни ташкил этади.
Шунингдек, узунлиги 28 километр бўлган қисқа йўналиш — «Туркманли» маҳалласидан Хивагача бўлган йўл ҳам мавжуд. Ундан фойдаланиш ҳақи 20 минг сўм этиб белгиланган.
3,5 тоннагача бўлган енгил юк автомобиллари (N1), 8 нафардан ортиқ йўловчига мўлжалланган автобуслар (M2/M3) ҳамда оғирлиги 3,5–12 тонна бўлган ўрта юк автомобиллари (N2) учун тўлиқ йўналишдаги йўл ҳақи 40 минг сўм, қисқа йўналишда эса 25 минг сўмни ташкил этади.
Айни пайтда Урганч — Хива автомобиль йўлидан фойдаланиш учун тўлов сайти синов режимида ишламоқда. Йўл ҳақини тўлаш тизими 25 августдан тўлиқ ишга тушади.
Шунингдек, махсус мобил илова Google Play ва App Store’да мавжуд бўлади.
Сайт орқали йўл ҳолати, тирбандликлар, тахминий ҳаракатланиш вақти ва об-ҳаво шароитлари ҳақида маълумот олиш мумкин.
Электрон ҳамённи DEVHUB компанияси ишлаб чиққан VIA учинчи томон хизмати орқали ёки банк картасини улаш орқали тўлдириш мумкин. Йўл ҳақини қўлда тўлаш ёки ҳар бир қатновдан сўнг маблағни балансдан автоматик ечиб олиш функциясини ёқиш имкони ҳам мавжуд.
Сайтда транспорт воситасини давлат рақами, тоифаси, ишлаб чиқарувчиси, русуми ва ранги кўрсатилган ҳолда қўшиш мумкин.
Йўл белгиларига кўра, пуллик трассада максимал тезлик 150 км/соат, қайрилишларда эса 130 км/соат этиб белгиланган. Минимал тезлик 40 км/соатни ташкил этади.
Трассада пиёдалар, мопедлар, от-аробалар ҳамда тиркамали транспорт воситаларининг ҳаракатланиши тақиқланган.
Шунингдек, трассада қайрилиб олиш ва тўхташга ҳам рухсат берилмайди.
