Бу ҳақда Жиззах вилояти солиқ бошқармаси маълум қилди.
Қайд этилишича, шу йилнинг 7 август куни вилоят солиқ бошқармаси ҳамда ҳуқуқни муҳофаза қилувчи органлар ходимлари ҳамкорлигида Жиззах шаҳри, Тошкент кўчаси, 4А-уйда жойлашган «BLACK CASH» МЧЖга (номи ўзгартирилган) қарашли «AL-ARABIA» тунги клубида сайёр солиқ текшируви ўтказилди.
Текширув давомида бир қатор қонунбузилиш ҳолатлари аниқланган.
Хусусан, муассаса ходимлари томонидан мижозга 290 минг сўмлик харид учун нақд пулда тўлов амалга оширилган бўлса-да, харид чеки берилмаган.
Шунингдек, шохобча хазинаси масъуллар иштирокида саноқдан ўтказилганда, жами 3,2 млн сўм нақд пул шохобчада ўрнатилган онлайн назорат-касса машинасига кирим қилинмагани маълум бўлган.
Бундан ташқари, тунги клубда ички ҳисоб-китоб учун автоматлаштирилган ҳисобга олиш ўлчов воситалари мавжудлиги, бироқ ушбу қурилмалар солиқ органлари базасига интеграция қилинмагани аниқланган.
Қайд этилишича, мазкур ҳолат бўйича Солиқ кодексининг 227¹-моддасига асосан иккинчи чоракдаги соф тушумдан келиб чиқиб жавобгарлик чораси қўлланилади.
Текширувда тунги клуб ходимлари билан солиқ ҳисоботлари ҳам солиштирилган. Натижада 10 нафар ходим солиқ ҳисоботларида акс эттирилмагани, яъни уларнинг меҳнат фаолияти расмийлаштирилмагани аниқланган.
Солиқ хизмати органлари тадбиркорлик субъектларини қонунчилик талабларига қатъий риоя қилиш, тушумларни яширмаслик ва барча ходимларни белгиланган тартибда расмийлаштирган ҳолда фаолият юритишга чақирмоқда.
Яширин иқтисодиётга қарши назорат тадбирлари давом эттирилади.
