Yangi muzey Lazgi raqqsi hamda Avesto tarixi va merosini keng jamoatchilikka etkazishga xizmat qiladi. Muzeyda noyob eksponatlar, zamonaviy ekspozitsiyalar va axborot-kommunikatsiya texnologiyalari asosida tashkil etilgan ko‘rgazmalar namoyish etiladi.

Qarorga ko‘ra, muzey fondini shakllantirish, eksponatlarni asrab-avaylash, yosh avlodni tarixiy va madaniy merosga hurmat ruhida tarbiyalash, shuningdek, mahalliy va xorijiy sayyohlarni jalb qilish asosiy vazifalar etib belgilangan.

Ekspozitsiyalarni tashkil etishda zamonaviy texnologiyalar va jahon muzeyshunosligi tajribasini joriy etish ham ko‘zda tutilgan.

Muzey faoliyati Xorazm viloyati mahalliy byudjeti, muzeyning o‘z daromadlari, homiylik xayriyalari hamda qonunchilikda taqiqlanmagan boshqa manbalar hisobidan moliyalashtiriladi.

Shuningdek, Xorazm viloyati hokimligiga 2026 yil 1 iyulga qadar binoda ta’mirlash ishlarini amalga oshirish, ekspozitsiya yaratish va moddiy-texnik bazani shakllantirish vazifasi yuklatildi. Muzeyni malakali kadrlar bilan ta’minlash choralari ham ko‘riladi.

Qayd etilishicha, mazkur muzey Xorazmning boy madaniy merosini zamonaviy talqinda namoyish etuvchi, ma’rifiy va turistik ahamiyatga ega muhim maskanlardan biriga aylanishi kutilmoqda.