Ta’kidlanganidek, hujjat jamoat xavfsizligini ta’minlash, fuqarolar va tashkilotlarning mol-mulkini himoya qilish hamda qo‘riqlash faoliyati sohasidagi davlat siyosatini zamonaviy talablarga moslashtirishga qaratilgan.

Qonun bilan Ma’muriy javobgarlik to‘g‘risidagi kodeks, shuningdek «Ichki ishlar organlari to‘g‘risida», «Qo‘riqlash faoliyati to‘g‘risida» hamda «Litsenziyalash, ruxsat berish va xabardor qilish tartib-taomillari to‘g‘risida»gi qonunlarga tegishli o‘zgartirish va qo‘shimchalar kiritilmoqda.

Xususan, jamoat joylarida tamaki mahsulotini iste’mol qilish, noqonuniy ov qilish, daraxtlarni kesish va boshqa ekologik qoida­buzarliklarni ko‘rib chiqish vakolati Ichki ishlar vazirligi huzuridagi Qo‘riqlash departamenti mas’ul xodimlariga beriladi.

Shuningdek, qo‘riqlashning texnik vositalarini loyihalashtirish va ularga xizmat ko‘rsatish bo‘yicha ruxsatnoma berish vakolati Ichki ishlar vazirligiga o‘tkazilib, tadbirkorlik subyektlari uchun xabardor qilish tartibi joriy etilishi nazarda tutilgan.

Muhokama davomida mazkur qonun jamoat xavfsizligini mustahkamlash, aholi tinchligini ta’minlash hamda «Inson qadri – oliy qadriyat» tamoyilini amalda ro‘yobga chiqarishga xizmat qilishi ta’kidlandi.

Senatorlar fikricha, hujjatda xavfsizlikni ta’minlashda jazolashdan ko‘ra profilaktikaga ustuvor ahamiyat berilib, jamoat tartibi, profilaktika va qo‘riqlash faoliyatini yagona tizim sifatida samarali tashkil etish ko‘zda tutilgan.

Yalpi majlis yakunida Qonun senatorlar tomonidan ma’qullandi.