Ўатанласларымыз пара велоспорт, пара дзюдо, пара таэквондо, пара жүзиў ҳәм пара жеңил атлетика бойынша жарысларда алтын, гүмис ҳәм қола медальларын қолға киргизди.
Алтын медальлар
Пара велотрек бойынша ер адамлар арасында 3 км аралыққа жеке излеў жарысы финалында Бобур Тоштемиров қубла кореялы қарсыласын жеңип, 3:41.263 нәтийже менен алтын медальды қолға киргизди. Сондай-ақ, ол Пара Азия ойынлары рекордын орнатты. Бул Өзбекстан тарийхында пара велоспорт бойынша усы жарысларда қолға киргизилген дәслепки алтын медаль болды.
Пара жүзиў бойынша ҳаял-қызлар арасында S 5 класында 50 метрге еркин усылда жүзиў беллесиўлеринде Лолахон Қодирова 37,88 секунд нәтийже менен финишке биринши болып жетип келди. Ол алтын медаль менен бирге Азия рекордын да орнатты.
Гүмис медальлар
Пара дзюдо бойынша ҳаял-қызлар арасында J1 класында 60 кг ға шекемги салмақ категориясында Улжан Амриева финалда қытайлы Ши Ижие менен беллесип, гүмис медальды қолға киргизди. Мағлыўмат ушын, ол Ханчжоу-2022 Пара Азия ойынларында да қола медалына ийе болған.
Пара дзюдо бойынша ер адамлар арасында J2 класында 70 кг ға шекемги салмақ категориясында Кемран Нуриллаев финалға шекем жетип барды. Шешиўши беллесиўде ол қазақстанлы Ибрагим Нурмаханулаға қарсы гүрес алып барып, жарысты гүмис медаль менен жуўмақлады.
Пара таэквондо бойынша ер адамлар арасында К44 класында 58 кг ға шекемги салмақ категориясында Фаёзбек Валижонов финалда Қытай Тайпейи ўәкилине 0:2 есабында жеңилип, гүмис медальға ийе болды.
Ҳаял-қызлар арасында 52 кг ға шекемги салмақ категориясында қатнасқан Умида Мамаражабова да финалда моңғолиялы қарсыласына 0:2 есабында жеңилип, гүмис медальды қолға киргизди.
Пара жеңил атлетика бойынша ер адамлар арасында Т47 класында узынлыққа секириў беллесиўлеринде Омадбек Ҳасанов 6,99 метр нәтийже менен екинши орынды ийеледи.
Қола медальлар
Пара дзюдо бойынша ҳаял-қызлар арасында J1 класында 52 кг ға шекем салмақ категориясында Бону Бабаева индонезиялы Новиа Ларассатини жеңип, қола медалын қолға киргизди.
Сондай-ақ, J1 класында 60 кг ға шекемги салмақ категориясында Фатима Тўирова қола медалы ушын болып өткен беллесиўде қазақстанлы қарсыласын 100:0 есабында жеңди.
Ер адамлар арасында J1 класында 70 кг ға шекемги салмақ категориясында Иброҳимжон Акбаров өзбекстанлы Қосим Сафарқуловты жеңип, қола медалына ийе болды.
Пара таэквондо бойынша ҳаял-қызлар арасында 47 кг ға шекемги салмақ категориясында Қызлархан Исомиддинова япониялы қарсыласын 2:0 есабында жеңип, қола медалын қолға киргизди.
