Илажда еки елдиң 200 ден аслам рәсмий ҳәм исбилермен топарларының
ўәкиллери, жетекши санаат ҳәм саўда кәрханаларының басшылары қатнасты.
Сербия бизнеси "Галеника", "Абела Фарм", "Гоша
Фом", "Юмко", "Лусс Текстиль" ҳәм басқа көплеген
компаниялар тәрепинен көрсетилди.
Мәмлекетимиз басшысы өзиниң шығып сөйлеген сөзинде жоқары дәрежедеги
нәтийжели сөйлесиўлер еки тәреплеме қатнасықларда жаңа бет ашқанын атап өтти.
Олардың тийкарғы нәтийжеси Өзбекстан ҳәм Сербия арасында стратегиялық шериклик
орнатылғаны болды.
Өз-ара өним жеткерип бериў номенклатурасын кеңейтиў ҳәм бажыхана
тәртип-қағыйдаларын әпиўайыластырыў есабынан өз-ара саўда көлемин бир неше
есеге арттырыў керек. Санаат кооперациясын раўажландырыў мақсетинде
2026-2028-жылларға мөлшерленген биргеликтеги Ҳәрекетлер режеси қабыл етилди.
Өзбекстан
Президенти келешектеги экономикалық шерикликтиң әҳмийетли бағдарларын көрсетип
өтти. Тоқымашылық ҳәм электротехника, автомобиль қурылысы ҳәм санаат ушын
комплектлеўши бөлеклерди биргеликте ислеп шығарыўды шөлкемлестириў,
фармацевтика өнимлерин локализациялаў, мийўе-овощ өнимлерин терең қайта ислеў,
программалық тәмийнат ҳәм жасалма интеллект жойбарларын әмелге асырыў усылардың
қатарына киреди.
Өзбекстан
жетекшиси мәмлекетимизде Сербия бизнеси ушын қолайлы инвестициялық ҳәм
исбилерменлик шараятларын жаратыўға, ҳәр бир қоспа жойбарды әмелге асырыўда
әмелий жәрдем бериўге таяр екенин билдирди.
Илаж жуўмағында
бир қатар еки тәреплеме экономикалық келисимлер ҳәм саўда шәртнамаларына қол
қойылды.
