Сәўбет мүбәрек Қурбан ҳайыты қарсаңында, ўатанласларымыз Ҳаж әмеллерин орынлап атырған қутлы күнлерде болып өтти.
Мәмлекетимиз басшысы муфтий ҳәзиретлери арқалы муқаддес Мекке қаласында болып турған барлық зыяратшыларымызды Қурбан ҳайыты менен қызғын қутлықлап, олардың ел-журтымыздың тынышлығы, халқымыздың абаданлығы, жасларымыздың бахыт-ығбалы жолында етип атырған ийгиликли дуўалары қабыл болыўын тиледи.
Атап өтилгениндей, соңғы жыллары Жаңа Өзбекстанда ҳәр жылы 15 мыңнан аслам ўатанласымыз мүбәрек Ҳаж сапарына бармақта. Быйыл және бир ийгиликли баслама әмелге асырылып, Ўатан ҳәм халық мәпи жолында шын кеўилден хызмет еткен мийнет ветеранлары, олардың шаңарақ ағзалары, мәҳәлле белсендилери, нураныйлар және кем тәмийинленген шаңарақлардың ўәкиллеринен ибарат 100 ўатанласымыз биринши мәрте мәмлекет есабынан Ҳаж сапарына жиберилди.
Президентимиз зыяратшыларымыздың денсаўлығы ҳәм кейпияты ҳаққында сорады, ибадатларды орынлаўы ушын шөлкемлестириў жумысларының барысы менен қызықты.
Муфтий шайх Нуриддин Холиқназар Мекке ҳәм Мадина қалаларында зыяратшыларымыз ушын барлық зәрүр шараятлар жаратылып атырғанын, шөлкемлестириў жумыслары шөлкемлескенлик пенен өтип атырғанын атап өтти. Буннан қәлбинде шүкиршилик сезими толқынланған ўатанласларымыз муқаддес орынларда турып, Жаратқаннан елимиздиң тынышлығын, халқымыздың абаданлығын сорап дуўалар етип атырғанын атап өтти.
Сәўбетте мәмлекетимизде диний-ағартыўшылық тараўда әмелге асырылып атырған кең көлемли реформалар халқымыздың қәлби, руўхыйлығы ҳәм ағартыўшылығына үлкен унамлы тәсир көрсетип атырғаны айтып өтилди. Имам Бухарий комплекси, Ислам цивилизациясы орайы, Бурҳониддин Марғиноний илимий-ағартыўшылық ҳәм туризм комплекси сыяқлы жақында пайдаланыўға тапсырылған орынлар уллы бабаларымыздың бийбаҳа мийрасын кеңнен үгит-нәсиятлаўға хызмет етип атырғаны атап өтилди.
Күни кеше Қурбан ҳайытын елимизде өзгеше пайыз ҳәм көтериңкилик пенен белгилеў бойынша Президент қарары қабыл етилди. Мүбәрек әййямды белгилеўге байланыслы қайыр-сақаўат ҳәм мүриўбет илажлары да әмелге асырылады. Соның ишинде, жәрдемге мүтәж халық қатламларын қоллап-қуўатлаў, 10 мыңнан аслам балаларға қурамалы хирургиялық операцияларды өткериў, 2 мыңға шамалас аўыр кеселликке шалынған ўатанласларымызды емлеў ушын қосымша қаржылар ажыратылады. Мешит ҳәм қойымшылықларды абат етиўге де айрықша ресурслар қаратылыўы нәзерде тутылған.
Мәмлекетимиз басшысы турмыста көпти көрген, дуўагөй ҳажыларымыз елге қайтқан соң, ислам ағартыўшылығы ҳәм саламат исенимди халқымызға, әсиресе, жасларымызға терең жеткериўде, мәҳәллелерде мийрим-шәпәәт, аўызбиршилик ҳәм руўхый орталықты беккемлеўде үлги болатуғынына исеним билдирди.
Сөйлесиў соңында Президентимиз барлық зыяратшыларымызға сәлем жоллап, олардың саўаплы әмеллериниң қабыл болыўын, елимизге саў-саламат қайтыўын тиледи.
