Бул ҳаққында "Дунё" мәлимлеме агентлиги «Kazinform» мағлыўматларына сүйенип хабар берди.
Қазақстан ҳүкиметиниң қарарына муўапық, электрон рухсатнама сырт ел пуқаралары ушын мөлшерленген арнаўлы санлы платформа арқалы бийпул рәсмийлестириледи. Арза мәмлекетке кириў режелестирилген сәнеден кеминде 72 саат алдын тапсырылыўы керек. Рухсатнаманың әмел етиў мүддети 180 календарь күнди қурайды.
Жаңа система басқышпа-басқыш енгизиледи. Атап айтқанда, 2026-жыл 1-ноябрьден баслап ол Ақтаў халықаралық аэропорты ҳәм төрт автомобиль өткериў пунктинде — Павлодар ўәлаятындағы "Урлютобе", Жамбыл ўәлаятындағы "Аухатти", Түркстан ўәлаятындағы "Атамекен" ҳәм Жетисуў ўәлаятындағы "Нурлы Жол" пунктлеринде қолланыла баслайды.
2027-жыл 1-январьдан система Астана ҳәм Алматы аэропортларында, 1-марттан болса мәмлекет шегарасындағы басқа барлық өткериў пунктлеринде әмел етеди.
Соның менен бирге, 2027-жыл 1-июльге шекем электрон рухсатнаманың жоқ екенлиги сырт ел пуқараларына мәмлекетке кириўди бийкарлаў ушын тийкар болмайды.
Жаңа талап визасыз режим шеңберинде Қазақстанда болыў мүддетлерине тәсир етпейди. Мәселен, АҚШ, Уллы Британия, Германия, Франция, Япония ҳәм Қубла Корея пуқаралары мәмлекетте бир сапар даўамында 30 күнге шекем, 180 күнлик дәўир даўамында болса жәми 90 күннен көп болмаған мүддетке болыўы мүмкин.
Төмендеги категориядағы шахслар электрон рухсатнама рәсмийлестириў талабынан азат етиледи:
16 жасқа толмаған балалар;
65 жас ҳәм оннан үлкен шахслар;
әмелдеги Қазақстан визасы ямаса жасаў гүўалығына ийе болғанлар;
дипломатлар ҳәм рәсмий делегациялардың ағзалары;
қарарда белгиленген басқа категориядағы сырт ел пуқаралары.
Буннан тысқары, Қазақстанда жеке идентификация номерин рәсмийлестириў процесинде сырт ел пуқаралары ҳәм пуқаралығы болмаған шахслардың мәмлекетте болыў нызамлылығын тексериў механизмин енгизиў де усыныс етилмекте.
