Изертлеў даўамында вирустың көбейиўин тоқтатыў қәбилетине ийе
ҳәм жаңа терапия усылларын ислеп шығыў ушын перспектива ашып беретуғын еки
тәбийғый белок - PI16 ҳәм PPID анықланды.
АҚШтағы Глэдстоун геном иммунологиясы институты (GGII) илимпазлары АИВтың ген ҳәм белоклар
дәрежесиндеги Т-клеткалар менен өз-ара тәсириниң ҳәзирги күндеги ең толық
картасын дүзди. Бурын үйрениў лаборатория шараятында вирус клеткалардың тек 1-2
процентин зыянлағаны себепли қыйынласқан, бул болса процесслердиң толық
көринисин алыў имканиятын бермейтуғын еди, деп жазады RuNews24.
Жаңа изертлеўде 70% ге шекем клеткаларды инфекциялаў
имканиятын берген методика қолланылды. Бул АИВның белоклар синтези ушын
жуўапкер болған 20 мыңға шамалас генлердиң жумысына тәсирин таллаў ҳәм
организмниң тийкарғы қорғаныў механизмлерин анықлаў имканиятын берди.
Нәтийжеде илимпазлар Т-клеткаларға вирустың кириўи ҳәм
көбейиўине тосқынлық ететуғын 48 молекуланы тапты. Әсиресе PI16 ҳәм PPID белоклары итибарды тартты.
Изертлеўшилердиң пикиринше, АИВ олардың ислеп шығарылыўын төменлетиўге уқыплы
болып, бул инфекцияның раўажланыўына имканият береди.
Атап өтилиўинше, PI16
инфекцияның дәслепки басқышларын блоклап, вирус материалының клеткаға кириўине
тосқынлық етеди, PPID болса вирус генетикалық
материалының клетка ядросына жетип барыўына тосқынлық етеди.
Ең перспективлысы PPID
белок болып есапланады, оның активлигин клеткаға унамсыз тәсир көрсетпей-ақ
күшейтиў мүмкин. Бул жаңа терапевтикалық усылларды ислеп шығыўға тийкар болыўы
мүмкин.
Илимпазлардың атап өтиўинше, клиникалық қолланыўға шекем еле
узақ жол бар, бирақ ашылыў организмниң қорғаныў механизмлери ҳаққындағы
түсиниклерди сезилерли дәрежеде кеңейтеди ҳәм АИВға қарсы гүресиўде жаңа
бағдарларды жаратады.
