Бұл туралы Энергетика министрі Шерзод Хўжаев мәлімдеді.
Жобалар аясында Ферғана облысында күн электр станциясын салу, Ташкент облысында трансформатор зауытын тұрғызу және мыс өткізгіштер өндірісін жолға қою жоспарланып отыр.
Бірінші жоба аясында Ферғана облысының Бешарық ауданында қуаты 500 мегаватт болатын күн фотоэлектр станциясы және оны электр желісіне қосуға арналған электр беру желісі салынады.
Осы жобаның құны 350 миллион доллардан асады. Оны «Voltamp» компаниясы Өзбекстанның «UET Construction» кәсіпорнымен бірлесіп жүзеге асырады.
Алдын ала келісімге қол қойылған. 2027 жылдың бірінші тоқсанына дейін зерттеу жұмыстары жүргізіліп, қаржылық модель мен тариф анықталады. Тариф бойынша келісімге қол жеткізілгеннен кейін қорытынды келісімшартқа 2027 жылдың қаңтар-ақпан айларында қол қою жоспарланып отыр.
Әдетте мұндай электр станцияларын салу 18–20 айға созылады. Станция құрылысын 2027 жылы бастап, 2028 жылы пайдалануға беру көзделген.
Екінші жоба аясында Ташкент облысының Ахангарон ауданындағы электротехника өнеркәсіптік аймағында жоғары кернеулі және жоғары қуатты трансформаторлар шығаратын жаңа зауыт салынады.
Жоба «Voltamp» және «Nur Elektrik» компанияларының ынтымақтастығы негізінде жүзеге асырылады. Зауытта өндірілетін өнімдер ішкі базарға және экспортқа бағытталады.
Үшінші жоба «Voltamp» компаниясы мен Өзбекстанның «Texnokabel» кәсіпорнының ынтымақтастығында жүзеге асырылады. Жоба аясында трансформаторларда қолданылатын мыс өткізгіштер өндірісін жолға қою қарастырылған.
Айта кету керек, қазіргі уақытта мұндай өндіріс түрі елімізде жоқ.
Алдын ала есептеулер бойынша, үш жобаның жалпы инвестициялық құны 500 миллион долларды құрайды.
Энергетика министрінің атап өтуінше, бұл ынтымақтастықтың маңызды ерекшелігі – шетелдік инвестордың жергілікті компанияны алғаш рет мердігер ретінде емес, жобалардың тең құқылы серіктесі ретінде тартуында.