Үш жыл бұрын басталған Жаңа Ташкент жобасы аясында мемлекет инфрақұрылым мен маңызды әлеуметтік нысандар құрылысына қомақты қаржы бағыттап келеді. Бүгінге дейін жаңа қалаға 2 миллиард доллардан астам инвестиция салынды. Алайда құрылысқа жеке секторды тарту қарқыны қолда бар мүмкіндіктерге сай келмейтіні атап өтілді.
Қала құрылысына жалпы 20 мың гектар жер бөлінген. Бірінші кезеңде 6 мың гектар аумақта 50 миллиард долларлық жобаларды жүзеге асыру көзделген. Қазір мың гектардан астам аумақта негізінен мемлекеттік қаражат есебінен құрылыс жүргізіліп жатыр. Ал кәсіпкерлерге 94 гектар жер бөлінген.
– Жаңа Ташкент тек жаңа тұрғын үйлер салынатын аумақ емес, – деді Мемлекет басшысы.
Жаңа қала бизнес, білім беру, медицина, туризм және қызмет көрсету салаларын шоғырландыратын дербес экономикалық орталыққа айналуы керек. Осы тұрғыдан алғанда, инвесторларға бөлінген жердің үштен екісі тұрғын үй жобаларына тиесілі екені, ал 28 лот бойынша құрылыс жұмыстары әлі басталмағаны айтылды.
Мемлекет басшысы мұндай жағдайды инвесторлардың қаражаты немесе қызығушылығы жоқтығымен түсіндіру дұрыс емес екенін атап өтті. Ескірген талаптар, созылып кететін рұқсат алу рәсімдері және кейбір мекемелердің серіктес болудың орнына бақылаушы ретінде әрекет етуі жобалардың жүзеге асуына кедергі келтіріп отыр. Осыған байланысты кәсіпкерге жер бөлуден бастап нысанды іске қосуға дейінгі барлық үдерісті қайта қарау міндеті жүктелді.
Жыл соңына дейін қалада 20 мың пәтерді пайдалануға беру жоспарланған. Бұл кемінде 70 мың адамға жаңа өмір сүру ортасын қалыптастыруды білдіреді. Президент тұрғын үйлермен қатар халыққа қажетті демалыс, спорт, сауда, білім беру және медициналық қызметтер де жолға қойылуы керектігін атап өтті.
Қалада FIFA талаптарына сай келетін 55 мың орындық стадион салынып жатыр. Келер жылы 20 жасқа дейінгі футболшылар арасындағы әлем чемпионатына байланысты қонақ үйлерге, тамақтану орындары мен ойын-сауық нысандарына деген сұранысты есептеп, кәсіпкерлерге нақты инвестициялық ұсыныстар әзірлеу тапсырылды.
Жаңа қалада іскерлік ортаны қалыптастыруда мемлекеттік мекемелердің көшірілуі де маңызды рөл атқарады. Қазір Құрылыс, Көлік және Энергетика министрліктері осында жұмыс істеп жатыр, басқа мекемелердің қызметкерлеріне арналған ғимараттар салынуда. Қалған министрліктер мен мемлекеттік ұйымдарды да Жаңа Ташкентке көшіруді бастау тапсырылды.
Кездесуде қаланың бас жоспарын жүзеге асыру барысында инвесторлардың бастамаларына кеңірек жол ашу қажеттігі айтылды. Қала мүддесіне сай келетін бірегей жобалар бойынша лот аумағын немесе нысан түрін өзгерту туралы ұсыныстар жедел әрі нақты өлшемдер негізінде қаралуы керек. Тұжырымдамасы, жобалық құжаттары мен құрылысқа рұқсаты алдын ала дайындалған жер учаскелерінің санын көбейту міндеті қойылды.
Ірі коммерциялық нысандарды тарту үшін ашық бастамалар мен «Swiss challenge» қағидаты негізінде жер бөлу тәжірибесі енгізіледі. Бұл тәртіп бойынша инвестордың бастамасы жарияланып, басқа қатысушылар бұдан тиімді шарт ұсынбаса, жер бастапқы бастамашыға беріледі.
Қызмет көрсету және әлеуметтік нысандар құрылысын ынталандыру үшін инфрақұрылымдық төлемдер қайта қаралады. Базалық мөлшерлеме сауда, сервис және бизнес орталықтары үшін үш есе, қонақүйлер мен туристік нысандар үшін бес есе, мәдениет және ойын-сауық орындары үшін он есе төмендетіледі. Жеке балабақшалар, мектептер мен ауруханалар үшін төлем 1 пайыз болып белгіленеді. Бұл тәртіп құрылысы басталған жобаларға да қолданылады.
Жаңа Ташкентте «жасыл ғимарат» стандарттарын енгізуге байланысты шығындарды азайту шаралары да белгіленді. Құны 50 миллион доллардан асатын тұрғын емес нысандар жобалары үшін «жасыл» сертификат алу шығындары мемлекет есебінен толық өтеледі. Инвестор сатып алған әрбір жер учаскесінің 30 пайызын көгалдандыру талабы бұл қалада қолданылмайды. Қала аумағының 30 пайызын жасыл аймаққа айналдыру бас жоспарға сәйкес мемлекет тарапынан қамтамасыз етіледі.
Құны 50 миллион доллардан асатын әрбір жобаға жауапты маман бекітіліп, ол нысан іске қосылғанға дейін инвесторға қолдау көрсетеді. Мұндай жобалар бойынша жеке инвестициялық келісім жасалып, онда тараптардың міндеттемелері мен жобаның ерекшеліктеріне сай шарттар белгіленеді.
Жаңа мүмкіндіктерді бүкіл ел кәсіпкерлері пайдалана алуы үшін елорданың әрбір ауданына және республиканың қалған 13 өңіріне Жаңа Ташкенттен 100 гектардан жер бөлінеді. Бұл учаскелер бойынша өткізілетін алғашқы аукционға тиісті өңірдің кәсіпкерлері қатысады.
Шетелдік инвесторлар үшін бастапқы кезеңде 50 лот белгіленді. Олардың орналасқан жері, экономикалық есептері мен ұсынылатын мүмкіндіктері қамтылған пакет дипломатиялық өкілдіктер арқылы жеткізіледі. Министрлерге де ірі шетелдік компаниялармен кездесулерде Жаңа Ташкент жобаларын таныстырып отыру тапсырылды.
Сондай-ақ Самарқанд қаласындағы «Ширин» тұрғын алабының құрылысы қаралды. Бұл жердегі жұмыстардың баяу жүріп жатқаны сынға алынып, Жаңа Ташкентке арналған жеңілдіктер мен мүмкіндіктерді осы аумақта да қолданылатыны айтылды.
Өзбекстан Президенті инвесторларды отандық және шетелдік деп бөліп қарауға қатысты пікір білдіре отырып: «Капиталдың, озық идеяның және адал еңбектің ұлты жоқ!» – деп атап өтті. Осы орайда Жаңа Ташкент пен «Ширин» тұрғын алабының құрылысына қатысып жатқан әрбір кәсіпкер еліміздің дамуына үлес қосып жатқаны айтылды.
Бұдан кейін Мемлекет басшысы инвесторлармен кездесіп, олардың ұсыныстары мен бастамаларын тыңдады.
