Балиқчиликни ривожлантириш маркази ҳолат юзасидан расмий муносабат билдирди.
Қайд этилишича, амалдаги қонунчиликка кўра, умумий фойдаланишда бўлган сув ҳавзаларида тақиқланмаган қурол ва усулларда 5 кг гача балиқни бепул овлашга рухсат этилган. Бу тартиб бекор қилинмайди. Яъни 5 кг гача балиқни бепул овлаш имконияти пуллик қилинмайди.
Шу билан бирга, 122-сон Фармоннинг 3-иловаси 4-бандида спорт-ҳавaскор балиқ овлаш ва экотуризм учун ташкил этилган хизматларни ягона тизимга жамлаш ҳамда аҳоли учун қулайлик яратиш кўзда тутилган.
Мазкур тизим орқали спорт-ҳавaскор балиқ овлаш учун шароит яратган хўжаликлар ўз хизматларини ихтиёрий равишда ягона платформага жойлаштириши мумкин.
Платформада сув ҳавзасининг жойлашган манзили, балиқ овлаш учун яратилган шароитлар, мавжуд хизматлар, бир кунлик балиқ овлаш нархи, шунингдек, мавжуд жойлар ва уларнинг бандлиги ҳақидаги маълумотлар акс эттирилади.
Ҳаваскор балиқ овловчи эса «Fishermen ID» тизими орқали ўзига қулай ҳудудни танлаши, мавжуд шароитлар ва нархлар билан танишиши ҳамда бўш жойларни олдиндан банд қилиши мумкин.
Банд қилинган хизмат учун тўлов амалга оширилгач, электрон QR-кодли чек тақдим этилади. Фуқаро ушбу чек асосида белгиланган кунда бориб, ташкил этилган шароитлардан фойдаланиши мумкин.
Шундай қилиб, мазкур тизимнинг жорий этилиши умумий фойдаланишда бўлган сув ҳавзаларида балиқни бепул овлаш имкониятини бекор қилмайди ва уни пуллик қилишни назарда тутмайди.
Тизимнинг асосий мақсади — балиқ овлашни истаган фуқароларга спорт-ҳавaскор балиқ овлаш ва экотуризм учун яратилган мавжуд хизматлар, уларнинг жойлашуви, шароитлари, нархлари ва бўш жойлари ҳақида ягона платформа орқали қулай ва очиқ маълумот олиш имкониятини яратишдан иборат.
