Умуман, маҳаллада ёшлар бандлигига жиддий эътибор бериляпти. Хусусан, ёшлар етакчиси “қизил” тоифадаги навқирон авлод билан индивидуал ишлаш натижасида уларнинг 4 нафарига юмуш топилди. Яна 2 нафарига имтиёзли кредит ва 1 нафарига ер ажратилиб, ижтимоий мослашуви учун кўмаклашилди. Бундан ташқари, “Ёшлар дафтари”даги бир талабанинг тўлов контракти тўлаб берилди. Маҳалладаги 320 дан ортиқ йигит-қиз турли спорт ва фан тўгаракларига жалб этилган. Бир нуронийга 10 нафар ёшни бириктириш тизими жиноятчиликнинг олдини олишда натижа бермоқда.

Маҳалланинг интилувчан ёшларидан яна бири Шерзод Тожимуротов ҳоким ёрдамчиси кўмаги билан 50 миллион сўм имтиёзли кредит олди. Бу пулга янги мебель цехини ишга туширди. Натижада қўшимча 2 та иш ўрни яратилиб, ёшлар бандлигига муносиб ҳисса қўшилди.

Ҳоким ёрдамчиси томонидан ўтказилган хатлов натижасида доимий даромадга эга бўлмаган 236 фуқаро аниқланди. Уларнинг 102 нафари турли корхона ва ташкилотларга ишга жойлаштирилди. Тадбиркорликни ривожлантириш мақсадида оилавий тадбиркорлик дастурлари доирасида 88 фуқарога жами 120 мил­лион сўмдан зиёд, яна 45 фуқарога эса 450 миллион сўм имтиёзли кредит ажратилган. Бундай имкониятдан 5 та йирик тадбиркор ҳам фойдаланиб, салкам 360 миллион сўм имтиёзли маблағ олган. Натижада маҳаллада 22 та микролойиҳа ишга туширилиб, 6 та янги якка тартибдаги тадбиркор ва

2 та масъулияти чекланган жамият ташкил этилди, 12 та янги иш ўрни яратилди.

Маҳаллада хотин-қизларни қўллаб-қувватлаб, ижтимоий фаоллигини ошириш борасида ҳам диққатга сазовор ишлар қилинмоқда. Жумладан, ишбилармон аёллардан бири Малика Йўлдошева нон ва нон маҳсулотлари ишлаб чиқариш цехини ишга туширди.

— Жорий йил бошида 265 та хонадон учун индивидуал режа ишлаб чиқилиб, эҳтиёжманд хотин-қизларга манзилли ёрдам кўрсатилди. Хусусан, ижтимоий ҳимояга муҳтож, ишсиз 29 аёлнинг 17 нафари иш билан таъминланди. Яна 7 нафари тикувчилик курсларида ўқитилди. Руҳий қўллаб-қувватловга муҳтож 32, жарроҳлик амалиётига муҳтож 1 ва ҳуқуқий ёрдам сўраган 57 аёлга кўмак берилди. Битта аёл 10 миллион сўм кредит олиб, тадбиркорликни бошлади, — дейди Қизилчоли маҳалласи оқсоқоли ­Ғофур Эримбетов.

Ҳудуддаги 12 та савдо ва хизмат кўрсатиш шохобчаси маҳалланинг асосий иқтисодий ўсиш драйверидир. Солиқ ходими саъй-ҳаракатлари билан салкам 380 миллион сўм мол-мулк ва ер солиғи йиғилиб, маҳалла бюджетига тушган 10 фоизи ҳудуд инфратузилмасини яхшилашга йўналтирилди.

Амударё туманидаги Фаровон маҳалласидаги ҳоким ёрдамчиси Муқаддас Бекназарова бошчилигида аҳолининг даромад манбаларини кенгайтириш бўйича тизимли ва манзилли ишлар қилинмоқда. Бу борада, айниқса, ёшлар ва хотин-қизларни қўллаб-қувватлашга алоҳида урғу бериляпти.

— Жорий йилнинг ўтган 6 ойи давомида фуқароларнинг мурожаатлари, ­тадбиркорлик қилиш истаги ва эҳтиёжлари чуқур таҳлил қилинди. Шу асосда аниқ манзилли чора-тадбирлар ишлаб чиқилди. Бизнес бош­лаш истагида бўлганларга бизнес режа тузиш ва ҳужжатларни расмийлаштиришда яқиндан ёрдам кўрсатилди. Натижада 58 фуқарога имтиёзли кредитлар ажратилиб, уларнинг барчаси soliq.uz электрон платформаси орқали расмий рўйхатдан ўтказилиб, бандлиги таъминланди, — дейди Муқаддас Бекназарова. — Шунингдек, ёшлар ва хотин-қизларга тикувчилик, чорвачилик, иссиқхона хўжалиги, савдо, паррандачилик ва хизмат кўрсатиш каби сердаромад соҳаларни ривож­лантириш бўйича кредитлар ажратилиб, кўплаб оилаларнинг молиявий барқарорлиги таъминланяпти. Бандликни таъминлаш йўналишида аҳоли, айниқса, ёшларни касб-ҳунарга ўқитишга жиддий эътибор қаратилган. Жорий йилнинг ўтган даври мобайнида 31 фуқаро, жумладан, 5 ёш касб-ҳунар курсларида ўқитилди. Айни пайт­да аҳолига кооперациянинг афзаллик­лари ва давлат субсидиялари ­ҳақида кенг қамровли маълумотлар бериб бориляпти.

Яратилаётган бундай шарт-шароитлар жойларда янги бизнес субъектлари пайдо бўлишига мустаҳкам замин бўляпти. Масалан, ушбу маҳаллада яшовчи ёш тадбиркор Жаҳонгир Раҳимбоев давлат кўмагидан унумли фойдаланиб, ветеринария дорихонаси очди. Аҳоли эҳтиёжини пухта ўрганиб иш бошлаган тадбиркор ҳозир чорвадорларга зарур дорилар ва озуқа қўшимчаларини узлуксиз етказиб бермоқда. Келгусида хизмат турларини янада кенгайтириб, қўшимча иш ўринлари яратишни мақсад қилган.

Ташаббускор ёшлардан яна бири Ёрқиной Еримбетова якка тартибдаги тадбиркор сифатида тикувчилик цехи очди. Бугунги кунда самарали фаолият юритаётган цехда хотин-қизлар учун миллий ва замонавий кийимлар, тўй либослари бичиб-тикилмоқда. Ёрқинойнинг келажакдаги режалари катта. У ускуналар харид қилиш орқали маҳалладаги ишсиз аёлларни доимий иш билан таъминлашни ният қилган.

— Маҳалладаги ижтимоий ҳимояга муҳтож қатламни манзилли қўллаб-қувватлаш тизими эътиборга молик. Ҳудуддаги жами 998 та оила тўлиқ хатловдан ўтказилиб, 54 таси ижтимоий реестрга киритилган. Шулардан 23 таси давлат таъминотидаги, 25 таси камбағал ва 6 таси камбағаллик чегарасидаги оила, — дейди “Фаровон” маҳалла фуқаролар йиғини раиси Баҳодир ­Бекберганов. — Реестрга киритилган барча оилаларнинг шароитини ҳисобга олиб индивидуал дастур ишлаб чиқилган. Шу асосда бугунгача 35 фуқаронинг муаммоси ижобий ҳал этилди. Шунингдек, камбағал оилаларни молиявий қўллаб-қувватлаш мақсадида 3 фуқарога асбоб-ускуна харид қилиш учун салкам 15 миллион сўм ссуда берилди.

Мана шундай тизимли ва кенг қамровли ишлар натижасида Фаровон маҳалласида камбағаллик даражаси 2,5 фоизга туширилди. Бу кўрсаткич шунчаки статистика эмас, балки одамларнинг ҳаётдан рози бўлиб, эртанги кунга ишонч билан интилаётганининг амалдаги ифодасидир.

Амударё туманидаги Оқолтин овулида йил бошида ёшлар тўлиқ хатловдан ўтказилди. Жараёнда жами 2305 йигит-қизнинг ижтимоий ҳолати ўрганилди.

83 нафари ишсиз экани аниқланди. Улар ҳудуддаги 4 та корхона ва ташкилот раҳбарларига бириктирилди. Ҳар бири учун мақсадли “йўл харитаси” ишлаб чиқилиб, ишли қилинди. Шунингдек, яна 3 ёш ҳудуддаги бошқа раҳбар ходимларга бириктирилиб, оталиққа олинди.

— Ёшлар бандлигини таъминлашда деҳқончилик учун ер ажратиш амалиёти яхши самара беряпти. Жумладан, овул ҳудудидаги “Сарагул Йўлдошева” фермер хўжалигидан электрон аукцион платформаси орқали очиқ савдога чиқарилган 42 сотих ерни ишсиз ёшлардан бири Ойдиной Турсунбоева ютиб олган эди. Ҳозир бу ерда сабзавот ва полиз экинлари етиштириб, оиласи бюджетига қўшимча даромад келтирмоқда, — дейди маҳалла ёшлари етакчиси Сардор Қурабоев. — Ушбу амалиёт ҳудудлардаги озиқ-овқат хавфсизлигини мустаҳкамлашга ҳам хизмат қилади.

Дарҳақиқат, ерга эгалик қилаётган йигит-қизлар меҳнат бозоридан ўз ўрнини ахтаришга мажбур бўлмайди. Аксинча, ўзи янги қиймат ва маҳсулот яратувчи мулкдорга айланади. Бу жараён ёшларда ерга меҳр уйғотиб, мустақил ҳаётга қадам қўйиш учун молиявий пойдевор яратади. Шу боис, ушбу йўналишдаги ишлар узлуксиз давом эттирилиб, 14 та фермер хўжалигининг ғалладан бўшаган майдонлари ҳисобидан ишсиз 80 ёшнинг ҳар бирига 10 сотихдан ер берилди.

Ёшларни бизнесга жалб этиш орқали улардаги боқимандалик кайфияти йўқолиб, ижтимоий масъулият ҳисси ортади. Ўз меҳнати билан даромад топаётган ёш авлод вакиллари мамлакатнинг барқарор иқтисодий ўсишини таъминловчи энг фаол қатламга айланади.

Бугун Амударё туманида ёшлар ана шундай фаол, ижтимоий масъулиятни ҳис этадиган авлод бўлиб камолга етмоқда.

Минажатдин ҚУТЛИМУРАТОВ,

“Янги Ўзбекистон” мухбири