Бу Президентнинг 2026 йил 10 ноябрдаги «Янги Тошкент шаҳри ва ҳудудларда юқори мультипликатив самарага эга йирик шаҳарсозлик лойиҳаларини қўллаб-қувватлаш чора-тадбирлари тўғрисида»ги ПФ–243-сон Фармонида белгиланган.
Ҳужжатга кўра, мазкур ташаббусдан кўзланган асосий мақсад мамлакатнинг инвестициявий жозибадорлиги ва туризм салоҳиятини ошириш, йирик инвестиция лойиҳаларини амалга оширишдаги маъмурий тўсиқлар ҳамда бюрократик ғовларни бартараф этишдан иборат.
Фармон билан ҳужжат иловасида белгиланган ҳудудларда шаҳарсозлик соҳасидаги йирик инвестиция лойиҳаларини қўллаб-қувватлаш учун «тартибга солиш қумдони» махсус ҳуқуқий режими жорий этилади.
Шунингдек, қонунчилик ҳужжатларида Янги Тошкент шаҳрини барпо этиш дирекциясига берилган ваколатлар, ҳуқуқлар ва имтиёзлар бошқа махсус ҳудудларни ташкил этишга масъул дирекцияларга ҳам татбиқ этилади.
Жумладан, ушбу дирекцияларга ҳудудларни ривожлантиришни режалаштиришга оид ҳужжатларга қўйиладиган талабларни мустақил белгилаш ва тасдиқлаш, ер участкалари сотилаётганда уларда қуриладиган объектларга нисбатан асосий талабларни мустақил белгилаш ваколати берилади.
Бундан ташқари, махсус ҳудудлардаги ер участкаларини реализация қилишда ҳар бир лойиҳа учун алоҳида техник шартлар белгилаш имконияти яратилади.
Мазкур чора-тадбирлар йирик шаҳарсозлик ва инвестиция лойиҳаларини амалга ошириш жараёнини соддалаштириш, сармоя жалб қилиш ҳамда ҳудудларнинг иқтисодий ва туристик салоҳиятини оширишга қаратилган.
