Бу ҳақда ЙҲХХ матбуот хизмати хабар берди.
Жорий йил 5 август куни соат 12:30 ларда Самарқанд шаҳри Регистон кўчасида хизмат олиб бораётган ЙПХ ходими йўл белгисига амал қилмай ҳаракатланган «Спарк» русумли автомобилни тўхтатган.
Ходим ҳайдовчидан тегишли ҳужжатларни тақдим этишни сўраган. Бироқ ҳайдовчи унинг қонуний талабини бажармаган. Инспектор талабни такрорлаганида эса ҳайдовчи ойнани қасддан ёпиб, қўли олд ойнанинг ичида қолган ходимни машина билан бир неча масофага судраб кетган.
Автомобиль кейинчалик тўхтатилганида ҳайдовчи яширинишга уринган. Тезкор-қидирув тадбирлари давомида транспорт воситаси ва унинг ҳайдовчиси аниқланиб, қўлга олинган.
Мазкур ҳолат юзасидан Самарқанд шаҳар прокуратураси томонидан Жиноят кодексининг 219-моддаси билан жиноят иши қўзғатилиб, тергов ҳаракатлари олиб борилмоқда. Ҳайдовчи процессуал тартибда қамоққа олинган.
Ҳайдовчи ўз қилмишидан пушаймонлигини билдириб, ЙПХ ходимлари ва уларнинг оила аъзоларидан узр сўраган.
Йўл ҳаракати хавфсизлиги хизмати барча ҳайдовчиларни йўл ҳаракати қоидаларига қатъий амал қилишга ҳамда ЙПХ ходимларининг қонуний талабларига бўйсунишга чақирди.
