Ҳукуматнинг 2026 йил 20 августдаги 449-сон қарори билан «Техникумлар билан дуал таълимни йўлга қўйган ҳамда битирувчилар бандлигини таъминлаган ташкилотларга кредит ажратиш тартиби тўғрисида»ги низом тасдиқланди.
Унга кўра, техникум билан дуал таълим бўйича амалдаги шартномага эга, ўқувчилар учун иш жойи ва ишлаб чиқариш амалиётини ташкил этган ташкилотлар кредит олиш ҳуқуқига эга.
Бунда ташкилот ўқувчиларга малакали мутахассисларни «устоз» сифатида бириктириши, дуал таълимда ўқиётганлар билан муддатли меҳнат шартномалари тузиши ва уларга иш ҳақи тўлаши лозим.
Шунингдек, ташкилот жорий йилда техникум битирувчисини вакант иш ўрнига меҳнат шартномаси асосида ишга қабул қилган бўлиши керак.
Кредит олиш учун ташкилотлар тижорат банкига ариза, тасдиқловчи ҳужжатлар, техникум ва ўқувчилар билан тузилган шартномалар нусхалари, дуал таълим дастури ва ўқувчилар рўйхати, кредитдан фойдаланиш режаси ҳамда солиқ қарзи мавжуд эмаслиги ҳақидаги маълумотни тақдим этади.
Тақдим этилган ҳужжатлар кредитга лаёқатлилик талабларига мос келган тақдирда, тижорат банки 3 иш куни ичида ташкилотга хабар беради, кредит шартномасини тузади ва маблағни унинг ҳисобварағига ўтказади.
