Университетнинг ўз маблағлари ҳисобидан 86,5 миллиард сўм йўналтирилиб, ўқув биносидан ташқари Қуёш физикаси илмий-тадқиқот лабораторияси, Ахборот-ресурс маркази ва 400 ўринли талабалар турар жойи барпо этилди.

Янги мажмуанинг тантанали очилиш маросимида Бухоро вилояти ҳокими Ботир Зарипов, Ўзбекистон Миллий ахборот агентлиги директори, сенатор Абдусаид Кўчимов, «Янги Ўзбекистон» ва «Правда Востока» газеталари бош муҳаррири, Ўзбекистонда хизмат кўрсатган журналист Салим Дониёров, республика ва вилоят миқёсидаги меҳмонлар, давлат ва жамоат ташкилотлари раҳбарлари, фахрий устозлар, профессор-ўқитувчилар ҳамда талаба-ёшлар иштирок этди.

Тадбирни очиб берган Ботир Зарипов мамлакатда таълим ва илм-фанга қаратилаётган эътибор, ёшлар учун яратилаётган имкониятлар ҳамда БухДУдаги бунёдкорлик ишларининг аҳамиятига тўхталди.

«Бугунги тадбир фақат янги ўқув йилининг бошланиши эмас. Бу — ёшларимиз учун янги имкониятлар эшиги очилаётгани, таълим ва илм-фанга қаратилаётган улкан эътиборнинг яна бир амалий ифодаси, Бухоро таълим тизими тараққиётидаги муҳим қадамдир», — деди вилоят ҳокими.

Янги мажмуада минглаб талабалар учун замонавий аудиториялар, рақамли ва инновацион таълим муҳити яратилган. Бу шароитлар ёшларнинг сифатли таълим олиши, илмий-тадқиқот ва ижодий изланишлар олиб бориши учун янги имкониятлар яратади.

Университетнинг бугунги лойиҳаси билан ишлар чекланмайди. Президент ташаббуси билан 30,2 гектар майдонда Бухоро давлат университетининг янги замонавий кампуси барпо этилмоқда.

Янги кампус таркибида 20 минг ўринли ўқув бинолари ва 5400 ўринли талабалар турар жойлари қурилиши режалаштирилган.

Мазкур йирик лойиҳа университетнинг таълим ва илм-фан салоҳиятини кенгайтириш, талабалар учун замонавий ва қулай муҳит яратиш билан бирга, Бухорони мамлакатдаги замонавий таълим ва илм-фан марказларидан бири сифатида ривожлантиришга хизмат қилиши кутилмоқда.

Тадбирда Бухоро давлат университети ректори, профессор Обиджон Ҳамидов университет жамоаси ва талаба-ёшларни янги ўқув йили билан табриклади. У, айниқса, биринчи босқич талабаларини «БухДУ талабаси» деган шарафли номга сазовор бўлгани билан қутлаб, уларни яратилган имкониятлардан унумли фойдаланиш, пухта билим эгаллаш, илмий ва ижодий изланишларда фаол бўлишга чақирди.

«Янги Ўзбекистон» ва «Правда Востока» газеталари бош муҳаррири, Ўзбекистонда хизмат кўрсатган журналист Салим Дониёров эса ёшларнинг жамият ҳаётидаги фаоллигини ошириш, юксак билим ва дунёқарашга эга бўлиш ҳамда Ватан тақдирига дахлдорлик ҳисси билан яшайдиган етук мутахассислар бўлиб камол топиши муҳимлигини таъкидлади.

Унинг фикрича, бугунги талаба нафақат ўз касбининг билимдони, балки жамият ҳаётида фаол иштирок этадиган, замонавий ахборот муҳитида ўз ўрнига эга бўлган ва мамлакат тараққиётига ҳисса қўша оладиган мутахассис бўлиб етишиши керак.

Тадбирда янги ўқув йилида таълим сифатини ошириш, илмий фаолиятни ривожлантириш ҳамда талабаларнинг замонавий билим ва касбий кўникмаларни эгаллаши учун шароитларни янада кенгайтириш устувор вазифалардан бири экани қайд этилди.

Тантанали маросимда янги ўқув биносининг рамзий очилиш маросими ўтказилиб, фахрий меҳмонлар томонидан қизил лента кесилди. Университет жамоасига янги бинонинг рамзий калити тантанали равишда топширилди.

Тадбир иштирокчилари янги ўқув биноси ва университетда барпо этилган замонавий инфратузилма объектлари билан танишди.