Онлайн-учрашув Ўзбекистоннинг ЮНЕСКО ҳузуридаги Доимий ваколатхонаси ташаббуси билан ўтказилди. Унда Ғарбий Австралия университети археология профессори, ИКОМОСнинг Қоя тош санъати бўйича халқаро илмий қўмитаси президенти Бенджамин Смит иштирок этди.
Муҳокамаларда, шунингдек, Ўзбекистоннинг ЮНЕСКО ишлари бўйича Миллий комиссияси, Маданият ва санъатни ривожлантириш жамғармаси, Маданий мерос агентлиги, Экология ва иқлим ўзгариши миллий қўмитаси ҳамда Навоий вилояти ҳокимияти вакиллари қатнашдилар.
Навоий вилоятида жойлашган Сармишсой мамлакатнинг энг машҳур қоятош санъати ёдгорликларидан биридир. Унинг кўплаб петроглифлари минтақа қадимий аҳолисининг турли тарихий даврлари ва маданий анъаналарини ўзида акс эттириб, Марказий Осиё меросини ўрганишда муҳим аҳамият касб этади.
Учрашув давомида Сармишсой қоятош тасвирларининг маданий қиймати ва ҳудуднинг табиий хусусиятларини ўзида бирлаштирган ҳолда аралаш бутунжаҳон мероси объекти сифатида тақдим этиш имконияти кўриб чиқилди.
Бенджамин Смит ёдгорликнинг салмоқли тарихий-маданий салоҳиятини қайд этди. Шу билан бирга, эксперт аралаш номинацияни асослаш учун ҳудуднинг табиий хусусиятларини қўшимча равишда ўрганиш зарурлигини таъкидлади.
Иштирокчилар ЮНЕСКОнинг Бутунжаҳон мероси тўғрисидаги конвенцияси талабларига алоҳида эътибор қаратдилар. Хусусан, қиёсий таҳлил ўтказиш, чегаралар ва буфер зоналарни белгилаш, объектни бошқариш режасини ишлаб чиқиш ҳамда петроглифларнинг узоқ муддатли сақланишини таъминлаш масалалари муҳокама қилинди.
Учрашув якунлари бўйича томонлар илмий материаллар алмашиш, қўшимча эксперт маслаҳатлашувларини ўтказиш ва узоқ муддатли ҳамкорлик форматларини белгилаш каби қўшма ишларни давом эттиришга келишиб олдилар.
Номинация ҳужжатларини тайёрлаш халқаро талаблар ва ЮНЕСКО экспертларининг тавсияларини ҳисобга олган ҳолда давом эттирилади.
