Портал тадбиркорлар, бухгалтерлар ва корхона раҳбарларига ўз ташкилоти фаолиятини бир неча сония ичида интеллектуал таҳлил қилиш, электрон ҳисобварақ-фактураларнинг “қизил” тоифага тушиш сабабларини аниқлаш, солиқ рейтинги, солиқ имтиёзлари ҳамда солиқ ҳисоботлари бўйича тушунтиришлар олиш имконини беради. Барча хизматлар мулоқот (чат) шаклида ишлайди ва фойдаланувчиларга содда, тушунарли ҳамда амалий жавобларни тезкор тақдим этади.
Солиқ тўловчилар учун мўлжалланган хизматлардан ташқари, порталда илк бор Солиқ қўмитасининг сунъий интеллект йўналишидаги барча асосий ишланмалари жамланган. Платформада амалиётга жорий этилган ечимлар билан бир қаторда, солиқ маъмуриятчилигини рақамли трансформация қилишнинг технологик асоси ҳам намойиш этилган.
Тақдим этилган ишланмалар қаторидан Soliq LLM миллий тил модели, нутқ ва матн генерацияси технологиялари, компьютер кўриш (computer vision) ҳамда катта ҳажмдаги маълумотлар (Big Data) асосида ишловчи машинавий ўқитиш (machine learning) ечимлари ўрин олган.
Бугунги кунда сунъий интеллект технологиялари нафақат бизнес учун мўлжалланган хизматларда, балки солиқ органларининг барча бўғинлари фаолиятида — маҳалладаги ходимлардан тортиб Солиқ қўмитаси раҳбариятигача кенг қўлланилмоқда. Сунъий интеллект маълумотларни таҳлил қилиш, такрорланувчи жараёнларни автоматлаштириш, бошқарув қарорлари сифатини ошириш ҳамда ходимлар иш самарадорлигини юксалтиришга хизмат қилмоқда.
Сунъий интеллект экотизимини яратиш ва ривожлантириш жорий йил бошида Президентимизнинг ташаббуси билан ташкил этилган Сунъий интеллект лабораторияси фаолияти натижасида амалга оширилмоқда.
Мазкур лаборатория солиқ маъмуриятчилигини такомиллаштириш, фуқаролар ва бизнес учун замонавий рақамли хизматларни яратишга қаратилган сунъий интеллект ечимларини ишлаб чиқиш, жорий этиш ва ривожлантириш бўйича ягона марказ ҳисобланади.
Солиқ қўмитаси келгусида ҳам сунъий интеллектнинг замонавий технологияларини кенг жорий этиш, солиқ тўловчилар учун интеллектуал хизматлар кўламини янада кенгайтиришни давом эттиради. Ушбу чора-тадбирларнинг асосий мақсади бизнес ва фуқароларнинг солиқ органлари билан ўзаро ҳамкорлигини янада содда ва қулай тарзга келтириш, шунингдек, кўрсатилаётган солиқ хизматлари сифатини янги босқичга олиб чиқишдан иборат.
