Миллий статистика қўмитаси маълумотларига кўра, октябрь ойида мамлакатда товарлар ва хизматлар нархи ўртача 0,6 фоизга ошган.
Нархлар ўзгариши айниқса озиқ-овқат маҳсулотларида сезилди. Жумладан, қўй гўшти 1,4 фоизга, суякли мол гўшти 1,2 фоизга, қийма 1,1 фоизга, сут 1 фоизга қимматлашди. Шакар эса 2,2 фоизга арзонлашди.
Сабзавотлардан бақлажон ва бодринг 9 фоизга, булғор қалампири 8,7 фоизга қимматлаган. Аксинча, олма 3 фоизга, банан 1,3 фоизга арзонлашган.
Октябрь ойида бензин нархи ўртача 1 фоизга, пропан 0,4 фоизга ошган. Метан нархида ўзгариш кузатилмаган.
Коммунал ва бошқа хизматлар орасида совуқ сув ва канализация хизматлари 4,7 фоизга, репетиторлик хизматлари 1,6 фоизга, такси хизматлари 1,3 фоизга, чет тиллари курслари 0,8 фоизга қимматлашган.
Қайд этилишича, октябрь ойида йиллик инфляция 6,5 фоизни ташкил этган. Бу кўрсаткич 2025 йил октябрь ойидаги даражадан 1,3 фоиз пунктга паст.
Нархларни кузатиш учун 10 мингдан ортиқ савдо ва хизмат кўрсатиш нуқталаридан 3 миллиондан зиёд нархлар қайд этилган.
