Ўзбекистон шахмати тарихида илк бор вакилимиз классик шахмат бўйича жаҳон чемпиони унвони учун кечадиган баҳсда иштирок этади. Бу нафақат Жавоҳир Синдаровнинг шахсий фаолиятидаги муҳим босқич, балки мамлакатимиз шахмати учун ҳам тарихий воқеадир.

Ҳиндистоннинг Hindustan Times нашри 13 ноябрь куни эълон қилган мақолада амалдаги жаҳон чемпиони Гукеш Доммаражу Жавоҳир Синдаров ҳақидаги фикрлари билан ўртоқлашган.

Нашр маълумотига кўра, Гукеш Вишванатан Ананд ва ChessBase India асосчиси Сагар Шоҳ билан суҳбатда ўзбекистонлик шахматчининг ўйинга муносабати, эркинлиги ва шахсий қизиқишларига алоҳида тўхталган.

«Синдаровдан ўрганган жиҳатларимдан бири — унинг шахмат ўйнаётганда ва кўплаб қизиқарли ишлар билан шуғулланаётганда нақадар хурсанд бўлишидир. Менимча, бу менга ҳам илҳом беради», — деган Гукеш.

Унинг бу фикрлари бўлажак рақибига нисбатан ҳурматини ҳам намоён этади. Юқори даражадаги профессионал шахматда натижа учун курашиш билан бирга, ўйиндан завқ олиш ва руҳий мувозанатни сақлаш ҳам муҳим аҳамиятга эга.

Гукеш икки гроссмейстернинг кучли ва заиф томонлари бир-бирига ўхшаш эканини ҳам таъкидлаган. Унинг фикрича, ҳал қилувчи баҳсда ким ўзини яхшироқ ҳолатда сақлай олиши, босимни қай даражада бошқариши ва керакли пайтда имкониятларидан фойдалана олиши катта аҳамият касб этади.

Амалдаги жаҳон чемпиони ўзининг муҳим устунликларидан бири сифатида бундай беллашувлардаги тажрибасини кўрсатган. У 2023 йил бошидан буён юқори даражадаги шахмат мусобақаларида мунтазам иштирок этиб келаётгани ва аввалги жаҳон чемпионлиги матчининг 18 кунлик мураккаб жараёнини бошдан кечиргани унга ёрдам беришини айтган.

Мақолада Синдаровнинг шахматдан ташқари қизиқишлари, жумладан, компьютер ўйинларига бўлган иштиёқи ҳам тилга олинган. Гукешни ўзбекистонлик шахматчининг профессионал фаолият билан шахсий қизиқишларини уйғунлаштира олиши ҳам ҳайратлантирган.

Бўлажак баҳсда бир томонда жаҳон чемпионлиги тажрибасига эга Гукеш, иккинчи томонда эса ўз ўйин услуби ва натижалари билан халқаро шахмат майдонида эътибор қозонган Жавоҳир Синдаров бўлади.

Мазкур тўқнашувда шахмат маҳорати билан бир қаторда тажриба, руҳий барқарорлик ва ҳал қилувчи вазиятларда тўғри қарор қабул қилиш қобилияти ҳам муҳим ўрин тутади.