Жорий йилнинг 9–10 сентябрь кунлари Париж шаҳридаги «Grand Palais» мажмуасида Франция Президенти Эммануэль Макрон ташаббуси билан биринчи Халқаро космик саммит бўлиб ўтди.

Саммитда космик соҳанинг келажаги, халқаро ҳамкорликни ривожлантириш, космик иқтисодиёт, илм-фан ва технологиялар, шунингдек, космик хавфсизлик масалалари муҳокама қилинди.

Тадбирда Ўзбекистон Республикаси Президенти Администрациясининг Молиявий технологиялар, рақамлаштириш ва сунъий интеллект бўйича департаменти раҳбари Бобур Ходжаев ҳамда Рақамли технологиялар вазири Шерзод Шерматов иштирок этди.

Саммитда 90 та давлат ва халқаро ташкилот вакиллари, қарийб 60 та давлат ва ҳукумат раҳбарлари ҳамда вазирлар, шунингдек, космик агентликлар, астронавтлар, экспертлар, стартаплар ва космик соҳадаги 1000 дан ортиқ етакчи компаниялар вакиллари қатнашди.

Тадбир доирасида космик соҳани ривожлантириш, халқаро ҳамкорликни мустаҳкамлаш ва космик фаолият барқарорлигини таъминлаш масалаларига алоҳида эътибор қаратилмоқда. Шунингдек, соҳадаги долзарб муаммолар ва уларни биргаликда ҳал этиш, илғор тажриба ҳамда билим алмашиш масалалари муҳокама қилинди.

Саммит доирасида «Тез ўзгараётган дунё учун янги космик макон», «Космик хавфсизлик: Европадан жавоблар» ва «Келажакдаги космик инфратузилма ҳақидаги қарашлар» мавзуларида давра суҳбатлари ўтказилди.

Шунингдек, «Глобал космик иқтисодиёт», «Хавфсизлик ва ҳамкорлик» ҳамда «Фан ва тадқиқотлар» йўналишларида панель муҳокамалари ташкил этилди.

Саммитда 14 та давлатдан 19 нафар таниқли астронавт иштирок этди. Улар орасида Франциядан Тома Песке, Италиядан Саманта Кристофоретти ва Лука Пармитано, Германиядан Александр Герст ва Маттиас Маурер, Бирлашган Араб Амирликларидан Султон Ал-Неяди, Туркиядан Алпер Гезеравжи ҳам бор.

Саммит космик соҳанинг бугунги ҳолати ва истиқболлари юзасидан фикр алмашиш, мавжуд имкониятларни муҳокама қилиш ҳамда келгусидаги ҳамкорлик учун янги алоқаларни шакллантириш имконини берди.

Тадбир доирасида ташкил этилган астронавтларни қутлаш маросимида Франция Президенти Эммануэль Макрон ҳам иштирок этди.