Жорий йилнинг 3–5 ноябрь кунлари Тошкент шаҳрида Марказий Осиё — Хитой (C5+1) фуқаро авиацияси соҳасидаги ҳамкорлик бўйича Ишчи гуруҳнинг учинчи йиғилиши бўлиб ўтди.
Унда Ўзбекистон, Хитой, Қозоғистон, Қирғизистон, Тожикистон ва Туркманистон авиация маъмуриятлари ҳамда авиакомпаниялари вакиллари иштирок этди.
Йиғилишда «Ҳаво ипак йўли»ни биргаликда барпо этиш бўйича келишув ижросини таъминлаш, минтақавий авиабозорни либераллаштириш, авиақатновларни кўпайтириш, меъёрий-ҳуқуқий базани мувофиқлаштириш ва илғор технологияларни жорий этиш масалалари муҳокама қилинди.
Учрашув доирасида Ўзбекистон ва Қозоғистон авиация маъмуриятлари ўртасида қуйидаги келишувларга эришилди:
Тошкент — Олмаота ва Тошкент — Остона йўналишларининг ҳар бирида мунтазам парвозлар сони ҳафтасига 42 тадан 60 тагача оширилади;
қолган барча йўналишларда парвозлар сони ҳафтасига 14 тадан 20 тага етказилади.
Шунингдек, Ўзбекистон ва Хитой ўртасидаги мунтазам авиақатновлар сонини ҳафтасига 100 тадан 114 тагача ошириш ҳуқуқи берилди. Эришилган келишувларни мустаҳкамлаш мақсадида тегишли ҳужжатлар имзоланди.
Йиғилишда фуқаро авиацияси инфратузилмасини ривожлантириш, парвозлар хавфсизлигини таъминлаш, «яшил» ва «ақлли» технологияларни жорий этиш, қўшма лойиҳаларни амалга ошириш масалаларига ҳам эътибор қаратилди.
Қайд этилишича, эришилган келишувлар Ўзбекистоннинг халқаро авиация бозоридаги мавқеини мустаҳкамлаш, транспорт-логистика боғлиқлигини ошириш, йўловчилар учун сафар имкониятларини кенгайтириш ҳамда савдо-иқтисодий ва туристик алоқаларни ривожлантиришга хизмат қилади.
Ишчи гуруҳнинг навбатдаги, тўртинчи йиғилиши 2027 йилда Қирғизистонда ўтказилиши белгиланди.
