Бу ҳақда Президентнинг 2026 йил 16 ноябрдаги «Спорт соҳасини рақамлаштириш ва самарали бошқарув тизимини йўлга қўйиш чора-тадбирлари тўғрисида»ги ПҚ–396-сон қарорида назарда тутилган.
Қарорга мувофиқ, жисмоний тарбия ва спорт ташкилотлари фаолиятини тўлиқ рақамлаштириш, «ERP sport» ягона электрон бошқарув тизимини жорий этиш ҳамда уни давлат ташкилотларининг бошқа ахборот тизимлари билан интеграция қилиш устувор вазифалар этиб белгиланди.
«ERP sport» тизими доирасида фойдаланувчиларга интерактив хизматлар кўрсатувчи «MySport» мобил иловасининг имкониятлари кенгайтирилади.
Жумладан, фойдаланувчилар давлат ва нодавлат спорт ташкилотларининг спорт иншоотларини соатбай, кунбай, ойлик ёки йиллик тарифлар асосида банд қилиши ва тўловларни бевосита тизим орқали амалга ошириши мумкин бўлади.
Шунингдек, давлат спорт ташкилотлари бинолари ва иншоотларини ижарага беришдан тушадиган маблағлар назорат қилиб борилади. Илова орқали спорт ташкилотлари рейтинглари, спорт турлари, хизмат тарифлари, иншоотлар жойлашуви, акциялар ва бошқа статистик маълумотлардан фойдаланиш имконияти яратилади.
Қарорда умумтаълим муассасаларида ўқувчиларни спортга жалб этишга ҳам алоҳида эътибор қаратилган.
Хусусан, мактаблар қошида спорт клублари ва тўгараклари тармоғини кенгайтириш, жисмоний тарбия ўқитувчилари фаолиятини ривожлантириш белгиланган.
Шунингдек, спорт мактабларини бириктирган ҳолда умумтаълим муассасаларида «Мактабдан Спорт академиясигача» ғояси асосида яккакураш ва жамоавий олимпия спорт турлари бўйича камида биттадан спорт тўгараги ташкил этилади.
2027 йил 1 январдан бошлаб «ERP sport» тизими орқали спорт мусобақалари ғолиблари ва совриндорларига QR-код қўйилган электрон диплом ҳамда сертификатлар бериш тартиби жорий этилади.
Бундан ташқари, Спорт вазирлиги тизимидаги спорт турлари бўйича Республика олий спорт маҳорати мактаблари негизида Олимпия терма жамоалари маркази ташкил этилади.
Янги чора-тадбирлар спорт соҳасида бошқарув самарадорлигини ошириш, хизматларни рақамли шаклга ўтказиш ва ёшларни спортга кенг жалб этишга қаратилган.