«Оила ва гендер» илмий-тадқиқот институти томонидан «Ички ва ташқи миграциянинг демографик жараёнлар ва оила институтига узоқ муддатли таъсирини баҳолаш» илмий лойиҳаси доирасида мамлакатдаги туғилиш кўрсаткичларининг узоқ муддатли прогнози амалга оширилди.
Прогнозга кўра, Ўзбекистонда туғилишлар сони келгуси йилларда ўсишда давом этади. Жумладан, 2030 йилда 892,7 минг нафар, 2040 йилда 1 миллион 16,1 минг нафар, 2050 йилда эса 1 миллион 234,1 минг нафар чақалоқ туғилиши кутилмоқда.
Ҳудудлар кесимида туғилишлар сонининг энг юқори ўсиш суръатлари Тошкент вилоятида 62 фоиз, Тошкент шаҳрида 61 фоиз, Андижон вилоятида 48,6 фоиз, Самарқанд вилоятида 43,3 фоиз ва Наманган вилоятида 42,4 фоизни ташкил этиши прогноз қилинган.
Туғилишнинг умумий коэффициенти бўйича эса ўрта муддатда бироз пасайиш, кейинчалик барқарор ўсиш тенденцияси кутилмоқда. Республика бўйича мазкур кўрсаткич 2030 йилда 21,2 промилле, 2040 йилда 20,8 промилле ва 2050 йилда 21,9 промиллени ташкил этиши мумкин.
2050 йилда туғилиш коэффициенти энг юқори бўлиши кутилган ҳудудлар орасида Сурхондарё вилояти 24,7 промилле билан етакчилик қилади. Кейинги ўринларда Қашқадарё вилояти — 23,8 промилле, Наманган ва Самарқанд вилоятлари — 23,1 промилле, Андижон вилояти — 22,9 промилле ҳамда Тошкент шаҳри — 22,3 промилле кўрсаткич билан қайд этилган.
Мутахассислар фикрича, туғилишлар сонининг ўсиши келгуси йилларда таълим, соғлиқни сақлаш, мактабгача таълим, уй-жой, ижтимоий хизматлар ва меҳнат бозори инфратузилмасига бўлган эҳтиёжнинг ортишига олиб келади.
Шу боис демографик ўзгаришларни олдиндан баҳолаш давлат ресурсларини самарали тақсимлаш, ҳудудларни комплекс ривожлантириш ва инсон капиталига йўналтириладиган инвестицияларни стратегик режалаштиришда муҳим аҳамият касб этади.
