Миграция агентлиги маълумотига кўра, ишга қабул қилинадиган номзодлар учун Тошкент шаҳрида 8 ойлик бепул немис тили курслари ташкил этилади. Таълим харажатлари Deutsche Bahn томонидан қопланади. Курслар якунида номзодлар немис тили бўйича B1 даражасидаги имтиҳонни муваффақиятли топшириши лозим. Немис тилини олдиндан билиш эса мажбурий талаб ҳисобланмайди.
Таклиф этилаётган иш ўрни доирасида мутахассислар темир йўл платформалари, вокзаллар ва бошқа инфратузилма объектларини таъмирлаш, уларга техник хизмат кўрсатиш, ғишт териш, қолип ўрнатиш, бетонлаш, пойдевор қуриш ҳамда ер ости қурилиш ишларини бажаради. Шунингдек, қозиқлар қоқиш, бурғилаш, устунлар ўрнатиш ва оддий геодезик ўлчаш ишлари ҳам вазифалар қаторига киради.
Ойлик 3 418,84 евро миқдоридаги маош солиқлар ушланмасидан олдинги сумма ҳисобланади. Бундан ташқари, иш вақтидан ташқари, дам олиш ва байрам кунларида меҳнат қилганлик учун қўшимча ҳақ тўланади. Ходимларга Германияда уй-жой топиш ва рўйхатдан ўтиш жараёнларида ҳам кўмаклашилади. Компаниянинг ички малака ошириш дастурлари орқали касбий билим ва кўникмаларни ривожлантириш имконияти ҳам мавжуд.
Дастурда иштирок этиш учун номзодлар қурилиш соҳасида касбий таълим олган бўлиши керак. Бино ва иншоотлар қурилиши, ер ости объектлари, бетон ишлари ёки йўл қурилиши йўналишидаги мутахассислар талаб этилади. Қурилиш майдонларида иш тажрибаси, амалий кўникмалар ва техник билимлар қўшимча устунлик беради.
Шунингдек, номзодлар жамоада ишлаш, жисмоний меҳнатни бажариш, турли қурилиш майдонларида фаолият юритиш ва зарур ҳолларда иш объекти ҳудудида тунаб қолишга тайёр бўлиши лозим. B тоифали ҳайдовчилик гувоҳномасига эга бўлиш ҳам афзаллик ҳисобланади.
Ҳужжат топширишда мактаб аттестати ва баҳолар кўрсатилган иловаси, мавжуд бўлса, ўрта махсус ёки олий таълим дипломи ва унинг иловаси, резюме, иш тажрибасини тасдиқловчи ҳужжатлар, паспорт ҳамда ҳайдовчилик гувоҳномасини тақдим этиш талаб қилинади.
Мазкур таклиф қурилиш соҳасида маълумот ва тажрибага эга бўлган, Германияда ишлаш ҳамда касбий фаолиятини ривожлантиришни истаган ўзбекистонликлар учун имконият яратади.
