Дар мамлакатамон ҷиҳати рушди соҳибкорӣ, дастгирии лоиҳаҳои сармоягузорӣ ва офаридани иқтидорҳои нави истеҳсолӣ корҳои васеъмиқёс амалӣ мешаванд. Ҳамзамон, истифодаи пурра аз имкониятҳои мавҷудаи саноат, таъмини фаъолияти устувори корхонаҳое, ки қаблан ба кор шурӯъ кардаанд, инчунин баланд бардоштани иқтидори истеҳсолӣ ва содиротии онҳо ҳамчун вазифаи муҳим боқӣ мемонад.
Дар ҷараёни муаррифӣ натиҷаҳои омӯзиши фаъолияти корхонаҳое, ки бо сабабҳои гуногун бо иқтидори пурра кор намекунанд ва даромадашон коҳиш ёфтааст, баррасӣ шуд. Чунин ҳолатҳо асосан дар соҳаҳои бофандагӣ, масолеҳи сохтмонӣ, маҳсулоти хӯрокворӣ, нафту кимиё, электротехника ва дигар шабакаҳо мушоҳида мешаванд.
Мушкилоте чун норасоии маблағҳои гардишӣ, масъалаҳои марбут ба инфрасохтори коммуналӣ, ба таъхир афтодани лоиҳаҳо, кӯҳна шудани таҷҳизот, халалдоршавии занҷири таъминоти ашёи хом ва паст шудани талабот ба маҳсулот дар радифи омилҳое зикр гардиданд, ки ба фаъолияти ин гуна корхонаҳо таъсири манфӣ мерасонанд.
Тавассути ҳалли ин мушкилот, барқарор намудани истеҳсолот ва ба кор андохтани иқтидорҳои мавҷуда дар корхонаҳо, мавҷудияти имконияти истеҳсол ва содироти маҳсулоти иловагӣ ба маблағи 65,6 триллион сӯм муайян карда шуд.
Бинобар ин, ҷиҳати ба таври алоҳида омӯхтани ҳолати ҳар як корхона, кӯмак расонидан барои ба иқтидори пурра баровардани онҳо роҳандозии низоми нав муқаррар гардид. Бо ин мақсад бо иштироки идораҳои масъул ва бонкҳо Ситоди ҷумҳуриявӣ таъсис дода мешавад. Намояндагони ситод ба ҷойҳо баромада, дар муҳлати ду ҳафта масъалаҳоеро, ки монеаи фаъолияти корхонаҳо мешаванд, муайян мекунанд ва ҷиҳати ҳалли онҳо дар ҷойи худ чораҳо меандешанд.
Барои ҷудо кардани маблағҳои зарурии кредит, таъмин бо маблағҳои гардишӣ, ҳалли масъалаҳои инфрасохтор ва ашёи хом барои корхонаҳое, ки имкони эҳёи фаъолияташонро доранд, бонк ва идораҳои масъул якҷоя кор хоҳанд кард.
Дар муаррифӣ ба масъалаи молу мулки бузург, ки дар баланси бонкҳои тиҷоратӣ қарор доранд, низ диққати махсус дода шуд.
Имрӯзҳо дар тавозуни бонкҳо 70 адад амвол мавҷуд аст, ки арзиши ҳар кадоме аз 10 миллиард сӯм зиёд мебошад. Бобати дубора ҷалб намудани ин дороиҳо ба иқтисодиёт, дарёфти сармоягузорон ва ба майдонҳои истеҳсолӣ табдил додани онҳо таҳияи механизмҳои алоҳида муайян гардид.
Ҳамчунин дар тақдимот ба масъалаи баҳисобгирии фаъолияти лоиҳаҳое, ки дар доираи барномаҳои сармоягузорӣ ба кор шурӯъ кардаанд ва арзёбии самаранокии онҳо таваққуф карда шуд. Зикр гардид, ки баъзе аз корхонаҳое, ки тӯли солҳои 2021-2025 дар натиҷаи татбиқсозии қариб 17 ҳазор лоиҳа ба фаъолият оғоз намудаанд, дар ҳисоботҳои андоз ва оморӣ фаъолияти худро пурра инъикос намекунанд. Ба масъулон супориш шуд, ки ҳар як лоиҳаро омӯхта, инъикоси дурусти онҳоро дар андозбандӣ ва ҳисоботи оморӣ таъмин намоянд.
Баъзе масъалаҳое, ки ба муҳити корчаллонӣ таъсири манфӣ мерасонанд ва боиси эътирози мардум ва субъектҳои соҳибкорӣ мегарданд, баррасӣ шуда, пешниҳодҳо оид ба ҳалли онҳо муҳокима гардиданд.
Бахусус, масъалаҳое чун гузоштани пешлавҳа ва нишонҳои брендии субъектҳои соҳибкорӣ, баъзе талаботи маъмурӣ барои объектҳои хӯроки умумӣ ва савдо, тартибу тамоюлҳо дар муносибатҳои меҳнатӣ, пардохтҳои ғайринақдӣ, истифодаи имтиёзҳои андозӣ, ҷаримаҳои молиявӣ ва коғазбозӣ дар фаъолияти иқтисодии беруна мавриди муҳокима қарор гирифтанд.
Масалан, тибқи тартиби ҷорӣ, дар баъзе ҳолатҳо лавҳаҳое, ки номи корхона, навъи фаъолият ё рамзи савдоро инъикос мекунанд, ҳамчун реклама арзёбӣ шуда, барои онҳо барасмиятдарории шиносномаи алоҳида ва супоридани пардохтҳо талаб карда мешаванд. Ин ҳолат барои соҳибкорон на танҳо бори иловагии маъмурӣ эҷод мекунад, балки ба шинохта шудани иншооти савдову хидматрасонӣ, ҷараёни мизоҷон ва даромади онҳо низ таъсир мерасонад.
Бо назардошти ин, пешниҳод гардид, ки иттилооти дар бораи ном ва навъи фаъолияти субъекти соҳибкорӣ, ки дар бино ҷойгир шудааст, ҳамчун реклама арзёбӣ нашавад ва барасмиятдарории шиносномаҳои дахлдор барои онҳо бекор карда шавад. Бобати бо назардошти пешниҳодҳои соҳибкорон марҳила ба марҳила ҷорӣ кардани талаботи дизайнӣ оид ба ҷойгир кардани реклама ва дигар аломатҳои иттилоотӣ, инчунин, сода кардани тартиби гузоштани аломати савдо дар воситаҳои нақлиёти марбут ба шахсони ҳуқуқӣ ташаббусҳо пешбарӣ гардиданд.
Сода намудани тартиби баргардонидани як қисми андоз аз арзиши иловашуда барои корхонаҳои хӯроки умумӣ, инчунин, сабуктар намудани талабот вобаста ба экспертизаи экологӣ ва пардохтҳои ҷубронпулӣ барои баъзе объектҳои савдо, хӯроки умумӣ ва хидматрасонӣ пешниҳод гардид. Инчунин, мушаххас намудани баъзе тартибу қоидаҳо дар муносибатҳои меҳнатӣ байни корфармо ва корманд пешниҳод карда шуд.
Дар самти рақамикунонӣ ва пардохтҳои ғайринақдӣ пешниҳодҳое баён шуданд, ки ба баланд бардоштани шароити мусоид барои аҳолӣ ва тиҷорат нигаронида шудаанд. Бахусус, бинобар густариш ёфтани таҷрибаи пардохтҳои ғайринақдӣ барои баъзе маҳсулот ва хидматрасониҳо, зарурати такмил додани инфрасохтори бонкӣ, комиссияҳо ва низоми баргардонидани маблағ (кэшбек) ба истеъмолкунандагон таъкид гардид.
Имконияти бидуни комиссия амалӣ намудани интиқоли пул байни кортҳои бонкии шахсони ҷисмонӣ, зиёд кардани шаклҳои мусоиди пардохтҳои ғайринақдӣ барои аҳолӣ ва фароҳам овардани имконияти фавран баргардонидани кэшбеки аз рӯи чеки харид дар соҳаҳои хӯроки умумӣ, фурӯши маҳсулоти спиртӣ, тамоку ва сӯзишворӣ пешниҳод гардид. Ҳамзамон, бо мақсади таъмини амният дар амалиётҳо, ки тавассути кортҳои бонкӣ амалӣ мегарданд, бознигарии хароҷоти марбут ба СМС-огоҳиномаҳои антифрод (зиддиқаллобӣ) ва истифода аз роҳҳои муқобил, чун хабарномаҳо дар замимаҳои мобилӣ ё идентификатсияи биометрӣ пешниҳод шуд.
Дар самти маъмурияти андоз ва ҷаримаҳои молиявӣ, масъалаҳое чун бартараф намудани ҳолатҳои баҳснок, ки ҳангоми истифодаи имтиёзҳои андоз ба миён меоянд, ҷорӣ намудани меъёре, ки мувофиқи он ҷаримаи таъхир (пеня)-и ҳисобшуда аз маблағи асосии қарзи андоз зиёд набошад, пешгирии ҳолатҳои суиистифода аз низоми ирсоли хабар дар бораи надодани чек ва такмил додани тартиби боздоштани шаҳодатномаи ААИ пешбарӣ гардиданд.
Бо мақсади содда кардани фаъолияти иқтисодии хориҷӣ, пешниҳодҳо дар бораи ихтисори ҳуҷҷатҳое, ки дар ҷараёни воридот якдигарро такрор мекунанд, фароҳам овардани тартиби мусоид барои дар хориҷ кушодани хонаҳои савдо, филиал ва намояндагиҳо аз ҷониби соҳибкорон, инчунин бо истифода аз имкониятҳои «Ӯзэкспомарказ» ба таври васеъ тарғиб намудани маҳсулоти миллӣ дар бозорҳои байналмилалӣ ба миён гузошта шуданд.
Сарвари давлат зарурати на ба бори иловагии тиҷорат, балки ба воситаи мусоид табдил додани коҳиши монеаҳои зиёдатӣ барои соҳибкорӣ, содда намудани механизмҳои назорат ва танзим, инчунин ҷараёнҳои рақамикунониро таъкид кард.
Ба масъулон бинобар пурра ба кор андохтани иқтидорҳои мавҷудаи саноатӣ, солимгардонии молиявии корхонаҳо, афзунсозии ҳаҷми истеҳсолот ва содирот, ташкили ҷойҳои нави корӣ ва васеъ намудани шароити мусоид барои соҳибкорон супоришҳои мушаххас дода шуданд.
