Qoraqalpog‘iston
Respublikasi va Xorazm viloyatini elektr energiyasi bilan ta’minlashda asosiy
energiya manbalaridan biri bo‘lgan "Taxiatosh IES" AJ ushbu mas’uliyatli
vazifani muvaffaqiyatli bajarib kelmoqda. Bugungi kunda stansiya kundalik
ehtiyojdan kelib chiqib bir kecha-kunduzda o‘rtacha 11 million kilovatt-soat
elektr energiyasi ishlab chiqarib, mintaqa energetika tizimining barqaror
ishlashiga salmoqli hissa qo‘shmoqda.
Elektr
energiyasi ishlab chiqarish - yuqori texnologiyalar bilan bir qatorda yuksak
mas'uliyatni ham talab etadi. Chunki energetika sohasida har bir uskuna, har
bir texnologik jarayon va har bir qaror inson hayoti bilan bevosita bog‘liq.
Shu bois xavfsizlik masalalari har doim birinchi o‘rinda turadi.
Shu maqsadda
"Taxiatosh IES" AJda 2026-yil 1-iyundan 1-iyulgacha "Xavfsizlik
texnikasi bo‘yicha ko‘rik oyligi" o‘tkazilmoqda. Ko‘rik oyligining asosiy
maqsadi - xavfsizlik madaniyatini mustahkamlash, baxtsiz hodisalarning oldini
olish, mehnatni muhofaza qilish talablariga rioya qilishni kuchaytirish va eng
qimmatli boyligimiz bo‘lgan inson hayoti va salomatligini muhofaza qilishdan
iborat.
Ko‘rik oyligi
davomida stansiyaning barcha sex va bo‘limlarida ish o‘rinlarining holati
o‘rganilib, xavfsizlik qoidalariga rioya etilishi tekshirilmoqda. Shu bilan
birga xodimlar uchun o‘quv seminarlari, amaliy mashg‘ulotlar, birinchi tez
tibbiy yordam ko‘rsatish bo‘yicha mashg‘ulotlar, avariya va favqulodda
vaziyatlarda harakat qilish bo‘yicha maxsus o‘quvlar tashkil etilmoqda.
Alohida ta’kidlash
kerak, energetika sohasida xavfsizlik faqat qog‘ozdagi talab emas. Bu har bir
xodimning kasbiy madaniyati, jamoa oldidagi mas'uliyati va oilasi oldidagi
burchidir. Chunki har bir energetikning sog‘-salomat ishlashi, kun oxirida o‘z
uyiga sog‘-salomat qaytishi eng asosiy maqsadlardan biri.
Oylik davomida
xavfsizlik qoidalariga namunali rioya etib kelayotgan xodimlarning tajribasi
keng ommalashtirilmoqda, kasbiy mahorat musobaqalari o‘tkazilib, eng yaxshi
natija ko‘rsatgan xodimlar va bo‘linmalar taqdirlanmoqda. Bu esa jamoa
o‘rtasida xavfsizlik madaniyatini yanada yuksaltirishga xizmat qiladi.
Qoraqalpog‘iston
Respublikasi va Xorazm viloyati aholisining energiyaga bo‘lgan ehtiyojini
qondirayotgan "Taxiatosh IES" AJda olib borilayotgan shunday
tadbirlar energetika uskunalarining ishonchli ishlashiga, baxtsiz hodisalarning
oldini olishga va eng asosiysi inson hayoti va salomatligini himoya qilishga
qaratilgan.
Chunki
xavfsizlik - bu faqat qoida emas, u barqaror energiya ishlab chiqarish,
ishonchli faoliyat va yorug‘ kelajakning mustahkam kafolatidir.
Minajatdin QUTLЫMURATOV,
«Yangi O‘zbekiston» muxbiri.
