Bu haqda Oʻzbekiston Respublikasi Qishloq xoʻjaligi vazirligi hamda Fermerlar kengashi maʼlum qildi.

Qayd etilishicha, bugungi kunda global iqlim oʻzgarishi va ekologik muvozanatning buzilishi natijasida chorva hayvonlari oʻrtasida yangi kasalliklar paydo boʻlish xavfi ortib bormoqda. Xususan, xorijiy davlatlarda chorva mollari orasida oqsil (yashir) kasalligining tarqalish ehtimoli yuqori ekani taʼkidlanmoqda.

Jahon hayvonlar sogʻligi tashkiloti maʼlumotlariga koʻra, 2025–2026 yillarda 48 ta davlatda ushbu kasallikning yangi “SAT” turlari aniqlangan. Mavjud vaksinalar esa ushbu turlarga qarshi toʻliq himoyani taʼminlamasligi mumkin. Shu bois, kasallikning oldini olishda har bir fermer va chorvadorning masʼuliyati va faol ishtiroki muhim ahamiyat kasb etadi.

Mutaxassislar xoʻjaliklarda quyidagi veterinariya-sanitariya talablariga qatʼiy amal qilishni tavsiya etmoqda:

  • kirish joylarida dezinfeksiya vositalarini tashkil etish;
  • begona shaxslar va transport vositalarining kirishini cheklash;
  • hayvonlarni zoogigiyenik talablar asosida parvarishlash;
  • sifatli ozuqa va toza suv bilan taʼminlash;
  • hududda doimiy tozalikni saqlash va zararli jonivorlarga qarshi kurashish.

Agar hayvonlarda kasallik alomatlari kuzatilsa, ularni zudlik bilan boshqalardan ajratish, veterinar kelguniga qadar izolyatsiya qilish va mustaqil ravishda dori qoʻllamaslik lozim.

Oqsil kasalligining asosiy belgilari — yuqori harorat, ogʻiz boʻshligʻi va tuyoqlarda yaralar, yelinda shikastlanishlar hisoblanadi. Bunday holatlarda darhol veterinarga murojaat qilish, binalarni dezinfeksiya qilish, hayvon mahsulotlarini hududdan tashqariga chiqarmaslik va sutni qaynatmasdan isteʼmol qilmaslik zarur.

Mutaxassislar taʼkidlashicha, kasallikning oldini olishda emlash eng samarali chora hisoblanadi. Qoramollar yilda ikki marta (bahor va kuzda), qoʻylar esa yilda bir marta emlanishi kerak. Zarur hollarda 2,5–3 oylikdan katta barcha hayvonlar majburiy emlanadi va 15–21 kun ichida immunitet shakllanadi.

Shuningdek, har qanday shubhali holatlarda (71-202-12-00, ichki: 210, 218, 323) raqamlari orqali mutaxassislarga murojaat qilish soʻraldi.

Maʼlum qilinishiсha, chorva salomatligini saqlashda tozalik va veterinariya qoidalariga amal qilish eng muhim omil boʻlib, bu yuqori mahsuldorlik va barqaror daromad garovidir.

Kasallikning oldini olish boʻyicha tavsiyalar bilan quyidagi havola orqali tanishish mumkin: