Илажда Корея Республикасы Президенти Ли Чжэ Мён, Қазақстан Республикасы Президенти Қасым-Жомарт Тоқаев, Қырғыз Республикасы Президенти Садир Жапаров, Тәжикстан Республикасы Президенти Эмомали Раҳмон ҳәм Түркменстан Президенти Сердар Бердимухамедов та қатнасты.
Өзбекстан Президенти бизнес-саммит қатнасыўшыларын қызғын қутлықлап, бүгинги күнде "Орайлық Азия - Корея Республикасы" форматы сапа жағынан жаңа басқышқа көтерилип атырғанын қанаатланыўшылық пенен атап өтти.
Мәмлекетимиз басшысы Корея компаниялары Орайлық Азияны 80 миллионнан аслам халық жасайтуғын, өсип баратырған талап, салмақлы ресурс, энергетика ҳәм инсан потенциалына ийе бирден-бир имканиятлар мәканы сыпатында қабыл етиўи ушын бирге ислесиўди өз-ара толықтырып барыў принципи тийкарында қурыўды усыныс етти.
Ҳәр бир мәмлекеттиң шийки зат базасы тийкарында санаат кооперациясы ҳәм Орайлық Азияда толық өндирис шынжырларын жаратыўға айрықша итибар қаратылды. Мәселен, Өзбекстанның минерал-шийки зат базасы кеминде 3 триллион долларды қурайды.
Ең әҳмийетли пайдалы қазылмалар тараўында жақын жылларда улыўма баҳасы 4 миллиард доллардан аслам 120 жойбарды әмелге асырыў нәзерде тутылған.
Регионның ресурс базасын Кореяның финанслық ҳәм технологиялық имканиятлары менен бирлестириў, онда тийкарғы итибарды шийки зат экспортына емес, ал терең қайта ислеў ҳәм таяр жоқары технологиялық өнимлер ислеп шығарыўға қаратыў усыныс етилди.
Биргеликте излениўлер алып барыў, алдыңғы технологияларды енгизиў ҳәм кадрлар таярлаў әҳмийетли бағдар сыпатында белгиленди. Мәмлекетлеримизге Корея компаниялары, университетлери ҳәм изертлеў орайларын тартыў, интеллектуаллық мүлк ҳуқықына ийе жаңа өнимлерди ислеп шығыў бойынша бирден-бир тандем жаратыў усыныс етилди.
Бес жылда ҳәр бир мәмлекеттиң экономикасында кеминде 10 миллиард доллар қосымша қун жарата алатуғын жасалма интеллектке айрықша итибар қаратылды. Буның ушын Қарақалпақстанда жасалма интеллект дата-орайлары ушын үлкен жеңилликлер берилген хаб шөлкемлестирилди. Корея компаниялары бул тараўға инвестиция киргизиўге мирәт етилген.
Ярымөткизгишлер ҳәм микроэлектроника ислеп шығарыў тараўындағы бирге ислесиўдиң перспективалары атап өтилди. Нурафшан қаласындағы Келешек технологиялары орайы негизинде ярымөткизгишлер, санаат микроэлектроникасы ҳәм жаңа материалларды жойбарлаў ҳәм сынақтан өткериў бойынша биргеликтеги орай шөлкемлестирилмекте.
Өзбекстан Корея ҳәм Орайлық Азия компанияларына илимий-изертлеў бөлимлери ҳәм лабораторияларды жайластырыў ушын шараят жаратып бериўге таяр.
Биотехнология ҳәм фармацевтиканы раўажландырыўда айрықша имканиятлар бар. Өзбекстанда дәри-дәрмақ ҳәм медициналық буйымлар базары ҳәзирги ўақытта 3 миллиард долларға жеткен. Изертлеўлер, клиникалық база ҳәм өндиристи бирлестирген биофармацевтика кластерин шөлкемлестириў усынысы билдирилди.
Онда тийкарғы итибар қәнигелер таярлаў, соның ишинде, регионымызда бирден-бир болған инженерлерди оқытыў, Кореяның лабораториялары ҳәм алдынғы кәрханаларында стажировка өтеў бағдарламасын жолға қойыўға қаратылды.
Корея компаниялары мысты қайта ислеў, электротехника үскенелерин ислеп шығарыў, автомобиль қурылысы ҳәм электромобиль санааты ушын комплектлеўши бөлеклерди локализациялаў, робототехника ҳәм автоматластырыў, биотехнология ҳәм фармацевтика, гидроэнергетика, энергия сақлаў системалары, энергетика тармақларын модернизациялаў, транспорт ҳәм қала инфраструктурасын раўажландырыў жойбарларына мирәт етилди.
