Сыртқы ислер министрлиги баспасөз хызметиниң мәлим
етиўинше, Өзбекстан пуқаралары ушын рухсат бериўши ҳүжжетлерди рәсмийлестириў
механизмлерин жетилистириў ҳәм мийнет мобиллиги мәселелерине айрықша итибар
қаратылды. Мийнет патентлерин алыў тәртип-қағыйдаларын әпиўайыластырыў
мәселелерин додалаў ушын Россия Ишки ислер министрлигиниң Ростов ўәлаяты
бойынша бас басқармасы басшылығы қатнасыўында өз алдына жумысшы мәжилис
өткериўге келисип алынды.
Сондай-ақ, 2027-жыл март айында Ростов ўәлаяты
делегациясының Өзбекстанға сапарына таярлық көриў мәселеси додаланды. Россия
тәрепи тиккелей исбилерменлик байланысларын орнатыў ҳәм биргеликтеги
жойбарларды ислеп шығыў ушын регионымыздағы бир қатар санаат кәрханаларының
ўәкиллерин өз қурамына киргизиўден мәпдар екенин билдирди.
Ростов ўәлаятындағы Инсан ҳуқықлары бойынша ўәкил
А.И.Харьковский менен ушырасыўда Өзбекстан пуқараларының нызамлы ҳуқықлары
менен мәплерин қорғаў мәселелери ҳәр тәреплеме көрип шығылды. Ўәкил аппаратының
бириктирилген ўәкили қатнасыўында жерлеслеримиз мийнет етип атырған кәрхана ҳәм
объектлерге биргеликте шығыўлар өткериў бойынша келисимге ерисилди.
Сондай-ақ, 100 ге шамалас Өзбекстан пуқарасы мийнет
етип атырған "ССК АВАКОН" жуўапкершилиги шекленген жәмийетинде
жерлеслеримиз бенен ушырасыў болып өтти. Тийкарғы итибар оларды
консуллық-ҳуқықый жақтан қорғаў ҳәм нызамлы ҳуқықлары менен мәплерин
тәмийинлеў, миграция ҳәм мийнет нызамшылығына әмел етиў мәселелерине қаратылды.
Пуқараларға зәрүр түсиниклер ҳәм әмелий усыныслар берилди.
Ушырасыўлар жуўмағында аймақлараралық бирге ислесиўди
раўажландырыў, шөлкемлескен мийнет мобиллигин жетилистириў, Өзбекстан
пуқараларының ҳуқықлары менен мәплерин избе-из қорғаў мақсетинде әмелий бирге
ислесиўди даўам еттириўге таяр екенлиги тастыйықланды.
