Өзбекстан Республикасы Президенти Шавкат Мирзиёев Италия Республикасының Айрықша ҳәм толық ҳуқықлы елшиси Гуидо де Санктис, Палестина Мәмлекетиниң Айрықша ҳәм толық ҳуқықлы елшиси Ваилла Батрехи, Саудия Арабстаны Патшалығының Айрықша ҳәм толық ҳуқықлы елшиси Саъд Абухаймид, Кувейт Мәмлекетиниң Айрықша ҳәм толық ҳуқықлы елшиси Туркий Ал-Мекрад, Алжир Халық Демократиялық Республикасының Айрықша ҳәм толық ҳуқықлы елшиси Жамила Ашур, Малайзия Айрықша ҳәм толық ҳуқықлы елшиси Рафеда бинти Абдул Азиз, Пакистан Ислам Республикасының Айрықша ҳәм толық ҳуқықлы елшиси Муҳаммад Мудассир Типу, Әзербайжан Республикасының Айрықша ҳәм толық ҳуқықлы елшиси Рашад Мамедов және Қазақстан Республикасының Айрықша ҳәм толық ҳуқықлы елшиси Ерали Тугжановтан исеним жарлықларын қабыл етти.

Мәмлекетимиз басшысы дипломатиялық ўәкилханалардың басшыларын Жаңа Өзбекстандағы миссиясының басланғаны менен қызғын қутлықлады.

Дүньяның түрли регионларында геосиясий кескинлик күшейип баратырған ҳәзирги қыйын дәўирде дипломатлардың жумысы барған сайын үлкен әҳмийетке ийе екени атап өтилди.

Президентимиз елшилердиң ҳәр бирине мүрәжат етип, олар ўәкиллик етип атырған мәмлекетлер менен бирге ислесиўди буннан былай да кеңейтиў бойынша тийкарғы ўазыйпаларға айрықша тоқтап өтти.

Италия үлкен сиясий ҳәм экономикалық потенциалға ийе әҳмийетли шерик екени атап өтилип, "жасыл" энергетика, металлургия, химия санааты, аўыл хожалығы, денсаўлықты сақлаў, фармацевтика, билимлендириў ҳәм туризм тараўларында биргеликтеги жойбарлар әмелге асырылып атырғаны, сондай-ақ, Турин политехника университети ҳәм Пиза университетиниң Ташкент қаласындағы филиаллары табыслы жумыс алып барып атырғаны атап өтилди.

Өзбекстан жетекшиси Ломбардия ҳәм Тоскана регионлары менен бирге ислесиўди раўажландырыў, соның ишинде, медицина кадрларын таярлаў бойынша биргеликтеги басламаларды қоллап-қуўатлайтуғынын билдирди.

Палестина менен қатнасықлар әзелий дослық байланыслары тийкарында раўажланып атырғаны атап өтилди. Өзбекстан Палестина - Израил келиспеўшилигин "еки халық ушын еки мәмлекет" принципи тийкарында тыныш жол менен шешиў тәрепдары.

Мәмлекетимиздиң Тынышлық кеңесине шөлкемлестириўши мәмлекет сыпатында кириўи Ғазаны қайта тиклеўге жәрдемлесиўге қаратылғаны атап өтилди.

Саудия Арабстаны менен бирге ислесиў үлгили болғаны атап өтилди. Мәмлекетимиз басшысы улыўма баҳасы 25 миллиард доллар болған биргеликтеги жойбарлар портфели қәлиплестирилгени, Саудия раўажланыў қоры Өзбекстандағы реформаларды әмелге асырыўға белсене жәрдем берип атырғанын айрықша атап өтти.

Буннан тысқары, денсаўлықты сақлаў, фармацевтика ҳәм "жасыл" энергетика тараўларында бирге ислесиўди кеңейтиў ушын үлкен потенциал бар екени атап өтилди. Мәмлекетимиз пуқараларының Ҳаж ҳәм Умра зыяратларын әмелге асырыўы ушын жаратылып атырған шараятлар да жоқары баҳаланды.

Саўда-экономикалық, инвестициялық, инфраструктуралық, денсаўлықты сақлаў ҳәм билимлендириў тараўларында Кувейт пенен бирге ислесиўди сапа жағынан жаңа басқышқа алып шығыў, Кувейт инвестициялық агентлиги менен нефть-химия тармағында ҳәм мәмлекетлик-жеке меншик шериклик механизмлери тийкарында қоспа жойбарларды әмелге асырыў ушын кең имканиятлар бар екенлиги атап өтилди.

Жоқары дәрежеде ерисилген келисимлердиң толық әмелге асырылыўы еки мәмлекет халықларының мәплерине хызмет ететуғыны атап өтилди.

Кейинги жыллары Алжир менен жоқары дәрежедеги байланыслар жеделлескени атап өтилди.

Нефт-газ, энергетика, таў-кән санааты, аўыл хожалығы ҳәм туризм тараўларында өз-ара пайдалы жойбарларды әмелге асырыў ушын үлкен потенциал бар. Қоспа Ҳүкиметлераралық комиссияны дүзиў ҳәм Жеңиллетилген саўда ҳаққындағы келисимге қол қойыў әҳмийетли екени атап өтилди.

Кейинги жылларда Малайзия менен қатнасықлар барлық бағдарларда избе-из раўажланбақта. Жоқары дәрежедеги сөйлесиўлер жеделлести. Өзбекстан базарына Малайзияның жетекши компаниялары жедел кирип келмекте.

Өзбекстан Президенти ярымөткизгишлер санааты, нефть-химия, ислам қаржылары ҳәм зыярат туризми тараўларында бирге ислесиўди раўажландырыў ушын үлкен потенциал бар екенин атап өтти.

Пакистан менен өз-ара ҳүрмет ҳәм исеним тийкарында раўажланған стратегиялық шериклик қатнасықлары сапа жағынан жаңа басқышқа көтерилди.

Ташкент - Карачи жөнелиси бойынша тиккелей авиақатнаўларды жолға қойыў, Трансаўған транспорт коридоры жойбарын әмелге асырыў, сондай-ақ, санаат кооперациясы, энергетика, аўыл хожалығы, тоқымашылық, фармацевтика ҳәм туризм тараўларындағы шерикликти және де тереңлестириў тийкарғы ўазыйпалар екени атап өтилди.

Еки мәмлекет жетекшилериниң беккем сиясий ерк-ықрары себепли Әзербайжан менен қатнасықлар стратегиялық шериклик ҳәм аўқамласлық дәрежесине көтерилгени атап өтилди. Өз-ара саўда көлеми 40 процентке артты, қоспа кәрханалардың саны дерлик 450 ге жетти, жүк тасыў көлеми еки есеге көбейди.

Жақын келешекте Өзбекстан ҳәм Әзербайжан арасындағы биргеликтеги инвестициялық портфельдиң көлемин 10 миллиард долларға жеткериў бойынша үлкен мақсет қойылды.

Болажақ жоқары дәрежедеги ушырасыўлар еки тәреплеме бирге ислесиўге жаңа пәт бағышлайтуғыны атап өтилди.

Қазақстан елшисине мүрәжат етип, мәмлекетимиз басшысы мәмлекетлеримиз арасындағы тарийхый дослық байланыслары беккемленип, стратегиялық шериклик ҳәм аўқамласлық қатнасықлары избе-из кеңейип атырғанын атап өтти.

Өз-ара саўда көлемин 10 миллиард долларға жеткериў тийкарғы мақсет екени атап өтилип, 8 миллиард долларлық биргеликтеги инвестициялық жойбарлар портфели қәлиплестирилген. "Орайлық Азия" халықаралық санаат кооперациясы орайын толық иске қосыўдан мәпдарлық билдирилди.

Мәресим жуўмағында мәмлекетимиз басшысы жаңадан тайынланған елшилерге ҳүрметли ҳәм жуўапкершиликли дипломатиялық жумысларында үлкен табыслар тилеп, өз-ара пайдалы шерикликти буннан былай да беккемлеў ушын барлық зәрүр шараятлар жаратылатуғынын атап өтти. Президентимиз барлық елшилерди жеке меншик сектор ҳәм аймақлар менен жедел бирге ислесиўге, орынлардағы дөретиўшилик өзгерислер менен жақыннан танысыўға шақырды.

Өз гезегинде, дипломатлар шын жүректен қабыллағаны ҳәм жаратылған шараятлар ушын миннетдаршылық билдирип, Өзбекстан менен көп қырлы бирге ислесиўди жедел алға қойыў ушын барлық имканиятларын иске қосатуғынын атап өтти.