Аввал Экопарк томонидан ҳаракатланиб, Мовароуннаҳр ва Маҳатма Ганди кўчалари томон қайрилмоқчи бўлган ҳайдовчилар рухсат этилган жойгача 2 километрдан ортиқ масофа босиб ўтишга мажбур эди.
Эндиликда қайрилиш имконияти Абдулла Қодирий кўчасининг ўзида ташкил этилди. Бунинг натижасида ҳайдовчиларга тахминан 500 метр йўл босишнинг ўзи кифоя қилади.
Маълум қилинишича, ўзгаришдан сўнг қайрилиш учун босиб ўтиладиган масофа қарийб тўрт баробарга қисқарди, ортиқча йўл эса деярли 75 фоизга камайди.
Шунингдек, аввал мазкур манёвр учун 6–8 дақиқа вақт сарфланган бўлса, эндиликда бу кўрсаткич 1,5–2 дақиқани ташкил этмоқда. Натижада ҳар бир ҳайдовчи ўртача 4–6 дақиқа вақт тежаш имконига эга бўлади.
ЙҲТЭМ маълумотига кўра, ушбу йўналишдан ҳар куни минглаб автомобиллар фойдаланади. Янги ечим нафақат ҳайдовчиларнинг вақтини тежайди, балки қўшни кўчалардаги ортиқча транспорт оқимини ҳам камайтиришга хизмат қилади.
