Бу 2026 йил 2 ноябрда имзоланган ЎРҚ–1186-сонли Қонунда белгиланган. Ҳужжат билан Маъмурий жавобгарлик тўғрисидаги кодекс янги 101¹-модда билан тўлдирилди.
Унга кўра, суюлтирилган углеводород газини истеъмолчиларга автомобилларга газ қуйиш шохобчалари томонидан маиший газ баллонларида бериш қонунбузарлик ҳисобланади. Бу талабни бузганлик учун БҲМнинг 3 бараваридан 5 бараваригача жарима белгиланган.
Қонун билан ёнғин хавфсизлиги соҳасидаги бошқа талаблар ҳам кучайтирилмоқда.
Жумладан, бозорлар, савдо комплекслари ва савдо-кўнгилочар марказлари мулкдорлари ёнғин натижасида учинчи шахсларнинг ҳаёти ёки соғлиғига зарар етказилганлик учун фуқаролик жавобгарлигини, шунингдек, объектларни ёнғиндан мажбурий суғурта қилиш бўйича мажбуриятни бажариши шарт. Бу талабни бузган мансабдор шахсларга БҲМнинг 75 бараваридан 100 бараваригача жарима солиниши мумкин.
Шунингдек, ёнғин аудитини ўтказиш тартибини бузганлик учун фуқароларга БҲМнинг 15 баравари, мансабдор шахсларга эса 30 баравари миқдорида жарима белгиланди.
Янги қонунга мувофиқ, бинолар ва иншоотлар ёнғин хавфи даражасига қараб гуруҳларга ажратилади. Уларнинг фаолиятини текшириш даврийлиги ҳам шу гуруҳларга боғлиқ бўлади. Айрим объектлар йилига бир марта, бошқалари эса икки ёки уч йилда кўпи билан бир марта текширилади.
Бундан ташқари, ёнғин хавфсизлиги талаблари бузилиши натижасида инсон ҳаёти ёки соғлиғига зарар етказилган тақдирда, айбдор шахсдан зарарни қоплаш билан бирга товон ҳам ундирилиши мумкин. Инсон вафот этган ҳолатда товон миқдори БҲМнинг 3000 бараваригача, I гуруҳ ногиронлиги юзага келганда 1500 бараваригача, соғлиққа бошқача шикаст етказилганда эса 600 бараваригача белгиланиши мумкин.
Қонун расмий эълон қилинган кундан эътиборан уч ой ўтгач кучга киради.
