Ўзбек футбол мухлисларининг мусобақа давомидаги асосий эътибори "Е" гуруҳидаги беллашувларга қаратилади. Мазкур гуруҳдан жой олган Ўзбекистон ўсмирлар терма жамоаси Италия, Ямайка ва Кот-д’Ивуар вакиллари билан куч синашади.

Сергей Чигодаев бош мураббийлигидаги жамоамиз Жаҳон чемпионатидаги илк учрашувини эртага, 20 ноябрь куни Тошкент вақти билан соат 21:00 да Кот-д’Ивуар терма жамоасига қарши ўтказади. 23 ноябрь куни соат 18:00 да Ямайка, 26 ноябрь куни эса соат 19:00 да Италия ўсмирлари билан баҳс олиб боради. Гуруҳ босқичидаги учала учрашув ҳам Доҳа шаҳридаги "Аспайр зона" мажмуасида бўлиб ўтади.

Мусобақада иштирок этадиган барча терма жамоалар 12 гуруҳга қуйидагича тақсимланган:

"А" гуруҳи: Қатар, Панама, Миср, Греция.

"B" гуруҳи: Жанубий Корея, Уганда, Янги Каледония, Эквадор.

"C" гуруҳи: Аргентина, Австралия, Мозамбик, Дания.

"D" гуруҳи: Франция, Гаити, Саудия Арабистони, Уругвай.

"E" гуруҳи: Италия, Ямайка, Кот-д’Ивуар, Ўзбекистон.

"F" гуруҳи: Сенегал, Хорватия, Куба, Тожикистон.

"G" гуруҳи: Мали, Янги Зеландия, Бельгия, Вьетнам.

"H" гуруҳи: Испания, Хитой, Фижи, Марокаш.

"I" гуруҳи: Бразилия, Ирландия, Танзания, Коста-Рика.

"J" гуруҳи: Доминикан Республикаси, Черногория, Чили, Жазоир.

"K" гуруҳи: Мексика, Руминия, Камерун, Венесуэла.

"L" гуруҳи: Япония, Колумбия, Сербия, Гондурас.

Мусобақа регламентига кўра, ҳар бир гуруҳда биринчи ва иккинчи ўринни эгаллаган жамоалар, шунингдек, учинчи ўрин соҳиблари орасида энг яхши натижа қайд этган саккизта терма жамоа кейинги босқичга йўл олади. Шу тариқа, 32 та жамоа плей-офф баҳсларида иштирок этади.

Қайд этиш жоиз, АҚШ ўсмирлар терма жамоаси 11 ноябрь куни мусобақада иштирок этишдан воз кечишини маълум қилди. ФИФА қарорига мувофиқ, унинг ўрнини Доминикан Республикаси эгаллади. Кариб ҳавзаси вакиллари учун бу U17 Жаҳон чемпионатидаги илк иштирок бўлади.

Мундиалнинг дастлабки кунида саккизта учрашув ўтказилиши режалаштирилган. Жумладан, Тошкент вақти билан соат 18:00 да Янги Каледония – Эквадор ҳамда Франция – Гаити, 18:30 да Жанубий Корея – Уганда, 19:00 да Саудия Арабистони – Уругвай, 20:00 да Мозамбик – Дания, 20:30 да Қатар – Панама, 21:00 да Миср – Греция ҳамда Аргентина – Австралия терма жамоалари ўзаро баҳс олиб боради.

Шунингдек, мазкур Жаҳон чемпионатида ўзбекистонлик ҳакамлар ҳам фаолият олиб боради. Аскер Нажафалиев бош ҳакам сифатида учрашувларни бошқарса, унга қанотларда Бахтиёрхўжа Шавкатов ва Авазбек Абдуллаев ёрдам беради. Ҳакамларимиз иштирокидаги илк ўйин бугун Мозамбик – Дания терма жамоалари баҳси бўлади.

Жавоҳир Тошхўжаев, ЎзА