Қазиш ишлари вақтида инсон суяклари, бронзадан ясалган билагузуклар, турли тақинчоқлар ва майда мунчоқлар топилган. Фуқаро топилма ҳақида зудлик билан Я.Ғуломов номидаги Самарқанд археология институтига хабар берган.

Институт мутахассислари топилма жойини кўздан кечириб, аниқланган археологик ашёлар ҳамда инсон суяк қолдиқларини белгиланган тартибда расмийлаштирган ва илмий ўрганиш учун қабул қилиб олган.

Дастлабки кузатувларга кўра, бронза билагузукларнинг айримлари конуссимон учлари ва спиралсимон безаклари билан ажралиб туради. Уларнинг шакли ва безак хусусиятлари бронза даврининг сўнгги босқичида яшаган дашт чорвадор қабилалари маданиятига хос тақинчоқларга ўхшаш.

Зарафшон водийсидаги қатор манзилгоҳ ва қабристонлардан ҳам бронза даврига оид, дашт чорвадор аҳолиси маданияти билан боғлиқ археологик материаллар аниқланган. Бундай ёдгорликлар, одатда, милоддан аввалги XIII–X асрлар билан саналиб, Андроново–Тозабоғёб маданий доираси билан боғланади.

Шу билан бирга, Дарвозағоза қишлоғида аниқланган янги топилманинг аниқ даври ва маданий мансублиги ҳозирча узил-кесил белгиланмаган. Бу масала махсус археологик қазишмалар, антропологик тадқиқотлар ҳамда металл буюмларнинг лаборатория таҳлиллари натижасида ойдинлаштирилади.

Мутахассислар эслатишича, ер қазиш ёки қурилиш ишлари жараёнида қадимий буюмлар, иншоот қолдиқлари ёки инсон суяклари аниқланса, ишларни дарҳол тўхтатиш ҳамда тегишли давлат органлари ва археология мутахассисларига хабар бериш лозим. Бу маданий мерос объектларини асраб-авайлаш ва уларни келажак авлодларга етказишда муҳим аҳамиятга эга.