Тошкент шаҳар Ички ишлар бош бошқармаси ҳамда Давлат хавфсизлик хизмати тезкор ходимлари ҳамкорлигида ўтказилган тадбирлар давомида 1995 йилда туғилган, аввал мазкур ўқув марказида қўриқчи бўлиб ишлаган шахс жиноий режа муаллифи экани аниқланди.
Режага кўра, гуруҳнинг ҳар бир аъзосига алоҳида вазифа юклатилган. Собиқ қўриқчи ўқув марказидаги ички вазиятни олдиндан ўрганиб, шерикларига пул сақланадиган жой ҳақида маълумот бериши керак бўлган. Гуруҳнинг яна бир аъзоси эса электр таъминотини узиши белгиланган.
Шундан сўнг ниқоб таққан гуруҳ аъзолари орқа эшикдан бино ичига кириб, пулларни қопларга жойлаштириши ва ижарага олинган автомобиль орқали олиб чиқиб кетиши режалаштирилган. Улардан бири жиноятни яшириш ва гувоҳларни чалғитиш мақсадида ҳатто аёллар кийимида бўлган.
Гуруҳ аъзоларидан бирининг кўрсатувига кўра, улар электр таъминоти узилганидан сўнг олд эшикдан кириб, пулларни олиб, орқа эшикдан чиқиб кетишни режалаштирган.
Бироқ жиноятчиларнинг режаси амалга ошмади. Тезкор ходимлар томонидан ўтказилган тадбир натижасида гуруҳ аъзолари қўлга олинди.
Маълум бўлишича, улар пулларни қўлга киритгач, Фарғона вилояти орқали қўшни республикалардан бирига чиқиб кетишни ҳам режалаштирган.
Қўлга олинган шахслар қилмишларидан пушаймон эканини билдириб, қилган ишлари учун яқинларидан узр сўрашди.
Тезкор тадбир давомида улардан жиноятда фойдаланиш учун тайёрланган ниқоблар, болға, қоп, қўлқоплар, радиостанциялар, эшикларни очишга мўлжалланган махсус мосламалар, калит нусхалари ҳамда хорижга чиқиш паспорти ашёвий далил сифатида расмийлаштириб олинди.
Тергов бошқармаси томонидан мазкур шахсларга нисбатан Ўзбекистон Республикаси Жиноят кодексининг 164-моддаси 2-қисми «а» ва «б» бандлари билан жиноят иши қўзғатилган. Уларга нисбатан қамоққа олиш тарзидаги эҳтиёт чораси қўлланилган. Ҳозирда дастлабки тергов ҳаракатлари давом этмоқда.
