Ma’lum qilinishicha, Davlat xavfsizlik xizmati Toshkent viloyati boshqarmasi hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbir davomida mazkur qonunga xilof harakatning oldi olingan.

Tergovga qadar tekshiruv materiallariga ko‘ra, Toshkent shahrida yashovchi, 1979 yilda tug‘ilgan shaxs tadbirkorlik faoliyatini boshlamoqchi bo‘lgan fuqaroning ishonchiga kirib, Yangiyo‘l tumani hududidagi davlat zaxirasi hisoblangan 1,5 gektar yer maydonini arxitektura va kadastr sohasida ishlovchi tanish mansabdorlar orqali uning nomiga rasmiylashtirib berishni va’da qilgan.

Evaziga u 750 ming AQSH dollari talab qilgan. Tezkor tadbir vaqtida mazkur shaxs so‘ralgan mablag‘ning bir qismi — 20 ming AQSH dollarini olgan paytda ashyoviy dalillar bilan ushlangan.

Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.